大胃王敢挑戰日本加大碼美食

史上最大份！Stamina超特盛丼登場

日本連鎖牛丼店吉野家，日前新推出有史以來最大份嘅 Stamina超特盛丼！巴閉之處係該丼集齊咗牛五花肉、豚肉及雞肉三種肉類，而且肉量亦十分驚人，所使用嘅牛五花肉及豚肉分別相等於牛五花丼並盛及豚丼並盛嘅肉分量，而雞肉方面亦係相等分量。3款肉加埋嘅肉量足足超過牛丼並盛嘅肉3倍有多。味道方面，今次將3款肉以蒜頭來調味炮製，並以大量炸蒜及青葱作配料，再加上另有小碗附上生蛋一隻！不過一客便超過1,700卡路里，有心減肥嘅朋友要三思！ 每份售¥798（約HK$57），於日本指定吉野家店舖有售。

網址：https://www.yoshinoya.com/menu/stamina/stamina-chotokumori-don

Stamina超特盛丼集齊牛五花肉、豚肉及雞肉三種肉類，食肉獸必Like！

3款肉加埋（圖左）足足超過牛丼並盛（圖右）嘅肉3倍有多，箇中差異睇圖一目了然。

1.6kg油麵山！ 重口味必食

日本呢排興食油麵，簡單講就係拉麵走湯，並加入醬油及麻油等變為撈麵嘅食法。想盡情食個夠本嘅話，不妨去距離東京武藏野市吉祥寺站徒步約3分鐘距離嘅麵Hachiichi/81 NOODLE BAR。呢間舖頭有午餐時段限定嘅油麵特大盛！店舖用上直徑達21.5cm嘅碗盛載，端上枱嘅油麵高達19cm，淨重1.6kg，感覺似一座小山。除咗大量嘅粗身油麵，亦有高麗菜、豆芽、筍乾及叉燒等配料，而且仲會加上豬油及蒜頭等調味，令味道更為濃郁。如此分量只售¥900（約HK$65），名副其實大件夾抵食呀！

網址：https://www.facebook.com/m8181n

看！高度達19cm嘅特大盛油麵，比手機高出一截！

舖頭布置偏向摩登，入夜後更有酒類供應。

1kg蛋包飯！　望落似欖球

要講日本人一大熱門美食，蛋包飯肯定係其一。不過當地一般餐廳只有一種分量選擇，但距離東京北千住站10分鐘步程嘅Kitchen Eggs，佢哋嘅蛋包飯卻有細份、中份、大份及加大份4種分量。當中加大碼版本蛋加飯足足重約1kg！送上枱時目測直徑接近30cm，高度約6cm，讓人聯想到欖球，相當誇張！除咗大件，味道亦相當不俗，雞蛋沒有加忌廉，蛋味濃郁。而內裏嘅茄汁飯則有火腿、洋葱、香菇等材料，並散發牛油香味。再加上自家調製嘅多蜜醬汁，食加大份都唔夠喉呀。

網址：http://www.kitchen-eggs-pc.com

究竟1kg奄列飯有幾巨？跟手機比較一下大家會有較清楚概念。每碟售¥1,630（約HK$117）。

餐廳環境及布置簡約宜人。

大食有出頭

正所謂食得是福，喺藝能界亦分分鐘因為「食得」而成功上位——話說2006年出道嘅辣妹曾根，便憑着大食量而走紅，經常上綜藝節目接受挑戰並幾乎都輕鬆勝出，因而贏得「大胃女王」嘅稱號，不過更神奇係佢食極都唔肥，令人超級羨慕！