航拍新瘋氣8萬蚊玩360全景升空

韓國訂製三軸雲台

外國有唔少人試過將360 Cam直接夾上航拍機拍攝，但此舉一來影唔到個天，二來條片又搖又震。Lock Sir構思DIY全景航拍機時，首要考慮拍出嚟條片夠定，所以最難唔係揀Cam或揀無人機，反而雲台先係最大難題。「我試過搵唔同廠訂造雲台，但航拍時發現減震效果麻麻，依家用緊嘅款式喺韓國訂製，廠方主要研發影視器材搖臂，就算航拍機點Chok，雲台都能夠保持水平位置；至於頂部用上智雲Rider-M電動雲台夾住GoPro，然後喺機身加入防震板和防震墊，務求做到全方位零震幅。」

遙控器要求不高，基本上能夠操控飛行方向就可以。	機頂裝上智雲Rider-M電動雲台及GoPro，主要拍攝天空環境。	這款自組360航拍機用上韓國訂製的三軸雲台，下方可安裝6部GoPro。

7部GoPro加ND濾鏡

市面嘅360 Cam，大多採用前後兩支魚眼鏡將影像拼貼，呢部DIY航拍機則用上多達7部GoPro，Lock Sir表示：「我選用DJI S1000機架，加上三軸雲台及7部GoPro，當中6部安裝於機底影地景，1部設置於機頂影天空。由於在日間航拍時GoPro的快門會較快，有機會出現『Jelly Effect』現象，即本來直線的景物會變成傾斜。為解決此問題，特別於鏡頭加裝ND濾鏡去減慢快門速度，而且設定要一致才能拼貼出完美360影像。」

從FPV鏡頭拍攝的第一身畫面，會經由圖傳裝置傳送到7吋屏幕實時顯示。	一般賣航拍用品嘅公司，都買得到USB圖傳接收器，再以《口袋FPV》App便能以手機觀察FPV圖傳影像。	機架會安裝FPV鏡頭，供操控者視察前方景觀。

《Autopano Video》合成影片

7部Cam拍出來的影片，需要後期加工才能合成360全景影片，Lock Sir笑言：「我自己用Kolor出品嘅《Autopano Video》電腦合成軟件，將多條影片合成出大約6K畫質嘅360全景片，單係1分鐘影片要花5~6小時去合成。」他續稱：「合成最困難嘅地方係同步影像，因為我拍攝48fps格數，就算差半格條片都會爛晒，因此我哋會飛幾次影多啲片；為了減少誤差，起飛前和降落後都會透過掌聲和聲音同步器，以便後製時每個畫面達至同步。」

雖然電池有16,000mAh，但由於360航拍機負重較高，每枚電池只夠飛7~8分鐘。	Big Head創作總監Lock Sir表示，自組360航拍機籌備了近一年時間，現時還在改良中。	今次用八軸設計嘅DJI S1000機架，Lock Sir表示將來或會改用DJI Matrice 600提升續航力。
利用《Autopano Video》合成軟件，將7部GoPro所拍嘅影片同步合成。	起飛前和降落後Lock Sir都會利用拍掌和聲音同步器，以便後製時將多條影片同步。	試片區 若想欣賞呢部DIY 360航拍機拍出嚟嘅影片，可於YouTube搜尋關鍵字「StarFish Bay AERIAL VR360」。從試片可見，接合位相當順滑，加上畫面達4K以上質素，影像相當細膩。

自組360全景航拍機

韓製三軸雲台　約$25,000

機架連飛控　約$20,000

GoPro運動相機×7　約$20,000

遙控器　約$4,000

電池×2　約$4,000

智雲Rider-M電動雲台　約$2,000

7吋屏幕連天線　約$2,500

雜項（電線及配件等）　約$2,500

總計　約$80,000

同場加映：360遙控車陸上專用

原來Lock Sir最初並非構思360航拍機，而係以陸上全景拍攝為基礎，整咗部360遙控車！他透露：「我特登買咗部有避震功能嘅遙控車，再加支碳纖中軸，裝上韓國訂製嘅三軸雲台和6部GoPro，以盡量減少穿崩位。不過由於中軸重心太高，故需用4條『威吔』拉緊避免翻車。」Lock Sir補充，遙控車續航力比航拍機長得多，毋須太理會操作時間。然而地面穿崩位仲未完美解決，需要後製時花點時間Key番個地面落去。

360遙控車裝上碳纖中軸及6部GoPro，單是遙控車成本要$25,000左右。

防震部分經由韓國訂造，再用4條「威吔」拉緊，就算轉彎都可保持平衡。

撰文：黎子豪

攝影：蔡浩文