1：1原大復仇者霸氣現身

雖則話君子復仇十年未晚，但睇復仇者卻遲一秒都嫌多！《復仇者聯盟2：奧創紀元》仲有十幾天就上映，造勢活動一浪接一浪。作為其忠實夥伴嘅Hot Toys，於Hysan Place搞咗個「雕塑級電影人偶展」，將復仇者成員及大奸角Ultron以1:1原大比例帶入銅鑼灣。現場睇一眾角色好似跳出銀幕咁逼真震撼，搞到小記更期待新戲來臨！

巨型雕塑逼真

Hot Toys並非首次將1:1雕塑帶到香港，早於兩年前的《Iron Man 3》，便曾把Hall of Armor搬進銅鑼灣，震撼觀眾眼球。今次再搞展覽的挑戰更大，主腦Howard坦言展品件件都比Iron Man更宏偉，幸好現場所見，Iron Man Mark XLIII、Hulk、Hulkbuster及Ultron都擁有極高神似度，當中位於啟超道、全組高4米闊6米的Hulk Vs Hulkbuster更具霸氣，Hulk肌肉逼真賁張，Hulkbuster則忠實還原出機械結構和金屬質感，配合全身16組發光元件及煙霧效果，猶如將戲中大戰搬到香港一樣。

「黑七」首度曝光

由於真人Look嘅復仇者製作難度較高，故Captain America及Thor兩個雕塑要稍後才亮相。然而想睇的話，都可透過場中的1:6 Figures望梅止渴；而Ultron Mark 1、Ultron Sentry及Ultron Prime亦有曝光，加上Iron Legion鋼鐵軍團，畀大家睇晒敵人嘅不同形態，好讓各位睇戲前先行熱身。不得不提的還有刮起全城熱話嘅「黑七」Iron Man Mark VII Stealth Mode Version，場內有其1:6 Figure展出，雖然實物冇官圖咁靚，但霧黑造型依然別具新鮮感，可惜現場有得睇冇得買，稍後才公布開訂時間。