Robot Boxing 打擂台

舉行香港比賽

提起機械人格鬥，日本可說是先驅，早年已經舉辦ROBO-ONE比賽，參賽水準極高。不過講到較多香港人留意，反而係台灣嘅Robot Boxing League（RBL），對於零件及參賽者限制冇咁多，難怪睇官方facebook短片，大人細路可以齊齊玩。最近有一班愛好者將RBL移植至香港，其籌委之一、有7年Robot Boxing經驗的Keith表示：「台灣RBL啱啱舉行完第4屆，香港應該喺7、8月舉行第1屆比賽。」

3分鐘內搶分

想參加Robot Boxing，第一步當然要學識點玩，再整番個機械人。「比賽同一般Boxing相似，玩家需要以兩足機械人作賽，而腳掌大小、雙手長度會因應機械人高度有所限制。以台灣RBL比賽為例，兩隻機械人將會喺一個邊長1.8m嘅八角形擂台比賽，令對方倒下便可得1分，3分鐘內攞到最高分就贏。」小記現場試睇格鬥時，眼見兩個機械人極之靈活，原來當中涉及機械工程、電腦程式等多樣知識，Keith補充：「以我隻Tri Robot為例，機身主要以纖維、鋁板打造，可動關節加入Servo（轉向伺服機），配合電路板及電池，一隻機械人基本完成。最緊要透過電腦將各組Servo協調，咁先可以將指令傳至機械人，做出不同動作。」

操控機械人的遙控器有不同類型，視乎玩家採用邊款電路板。

動作一覽 攻擊！ 坐低橫掃

跌低立即起身

聽起嚟唔係好難，但玩落發覺機械人跌低咗好難起番身，原來呢個正係關鍵。有近10年Robot Boxing經驗嘅William解釋：「製作一隻機械人，最重要係跌低咗識起番身，呢樣講求設計機械人時，有冇計算好機體平衡和重心轉移，否則連行都行唔穩。而機械人不時出現Servo扭力不足、重心失衡等問題，有時機身結構正常，但程式又未必配合到，所以要經過無數次微調。」

起身！ 拱橋翻身	William有近10年Robot Boxing經驗，為Robot Boxing League Hong Kong籌委之一。	Keith話除咗用手掣操控機械人外，仲可編寫程式以iPad作遙控器。

操機破解招式

縱然有好嘅機械人，但操作者要識用至得。首先，玩家可為機械人預設不同動作，點先容易擊中對手、被對手攻擊後冇咁易跌低、幾時退後迴避或防禦等，全部都考玩家對機械人嘅了解及臨場反應。好似Keith嘅Tri Robot可做出60多個動作，所以平時要不斷「操機」，熟習操控不同動作。另外，比賽前仲要預先諗吓對手出乜招，事關臨場好難再即時用電腦大幅調整機械人動作，他笑言「掃腳」係比較難破嘅招式，所以都幾講戰術運用。

放大圖片	機械人大解構 腳掌是兩足機械人穩陣與否的關鍵，一定計算好平衡。	想機械人夠靈活，每個關節都要加入Servo作轉動之用。
電路板可以話係機械人嘅大腦，控制大部分動作指令。

想玩可以點？

除咗好似Keith同William咁樣自製機械人外，其實坊間亦有廠商推出Robot Boxing機械人，俗稱「廠貨」，好似由韓國公司推出嘅Bioloid，備有18個Servo夠晒靈活，而且跟機已有齊遙控器，亦提供砌機、設定動作程式等教學，好易上手。另外，玩家亦可到外國網站訂購專屬機械人，上至外形、下至Servo數量任君選擇，自由度較高。

Bioloid採用18個Servo設計，售價約$9,600。	佛教何南金中學的學生代表陳國豪、 陳卓南、廖艷鳳（左至右）	簡Sir

網址：www.open-bot.com

學生有Say

佛教何南金中學的學生代表陳國豪、 陳卓南、廖艷鳳（左至右），曾贏過多項機械人比賽冠軍，包括墨西哥青少年機械人世界盃等，他們現時有玩Robot Boxing，更表示有興趣參加Robot Boxing League挑戰自己。

專家有Say

致力於學界推廣Servo Robot的迦密主恩中學簡Sir表示，現時不少學校都為學生提供Robot Training，由設計10個Servo機械人開始循序漸進，到Robot Boxing等活動都積極參與，他亦鼓勵學生參加「香港機械奧運會」等比賽。

撰文：林子聰　

攝影：陳世昌