日本CP+直擊F2.0光圈G1 X Mark II攝戰群雄

全球最大相機展之一的CP+，現正於日本橫濱舉行，Canon作為業界龍頭，今年傾巢而出帶來全新單反、無反、DC等機款，畀參觀者任試任玩。當中排得最長龍嘅攤位竟然唔係EOS 1200D單反，而係走Prosumer路線的PowerShot G1 X Mark II，除了沿用1.5吋大Sensor外，仲特別加大光圈至F2.0，配合180度翻芒設計同Wi-Fi等增值功能，以大改造姿態衝擊CP+現場。

180度輕觸式翻芒

小記踏入Canon展區，已見G1 X Mark II攤位設於當眼處，趁CP+開幕衝埋去都要等5分鐘先摸到部機。第一眼見其真身，雖然冇咗上代嘅ViewFinder，但可於Hotshoe加建另購的EVF-DC1電子觀景器，整體感覺更Pro，而且新機順應潮流加入180度輕觸式翻芒，一拎上手就影到靚靚自拍相，加上新機採用1.5吋1,280萬像素感光元件及新一代DIGIC 6影像處理器，隨時可捕捉精細靚相。

Wi-Fi加NFC功能

翻芒固然係新機賣點，更值得留意是鏡頭也脫胎換骨，擁有F2.0大光圈之餘，更引入大熱的星攝模式，雖然場內冇星星，之不過喺昏暗環境試拍，利用高ISO都唔覺影像有雜訊。另一改進地方係近攝距離由20cm縮短至5cm，所以試玩區準備了不少花卉畀人影微距，成像細緻清晰。而鏡頭上更設有兩個操作環，可調校光圈快門等設定，用上手更方便。此外，新機植入Wi-Fi及NFC功能，小記將手機輕拍G1 X Mark II側面，即可經Wi-Fi連線，並透過《Canon CameraWindow》App傳送影像，分享到facebook等社交平台一嘟搞掂。

放大圖片

加入星攝模式，夜晚影星軌都絕對冇問題。

機身減省了光學觀景器，但可於Hotshoe加裝另購的電子觀景器。

輕巧單反與高速無反

現場仲有其他好機試玩，當中包括EOS 1200D入門單反，擁有1,800萬像素和每秒3張連拍速度，不過外形同上代冇乜分別。值得一讚是廠方特設海外機種展示區，皆因EOS 1200D日版稱為Kiss X70，而海外機種展示區就見到晒熟悉嘅型號，唔會令人混淆。同場還有早前於日本公布的EOS M2無反相機，對焦速度顯著提升，更備有Wi-Fi功能，完成度非常高。

機側內置Wi-Fi和NFC功能，以手機一嘟即可連線過相，簡單直接。

Canon的展區面積龐大，而且機款包羅萬有。

G1 X Mark II攤位擺放了花卉供在場人士試拍，人頭湧湧。

五花八門DC、DV晒冷

除了單反和無反外，當然唔可以數漏各式DC，當中天涯機PowerShot SX700 HS及PowerShot SX600 HS，分別提供30倍變焦和18倍變焦能力，同樣內置Wi-Fi和NFC功能，帶去旅行夠晒方便。另有四防機仔PowerShot D30，支援25米防水、2米防撞、防塵和-10度防寒全天候拍攝，加上藍色機身望落去夠Sharp醒。至於DV方面，較矚目係擁有170度視角的LEGRIA mini X，今次特別強化收音效果，支援16-bit 48kHz Linear PCM收音，音色原汁原味。

EOS 1200D入門級單反機身細小，嬌滴滴嘅女仔啱用。	廠方第2代無反相機EOS M2，對焦速度大大提升。	LEGRIA mini X主要強化拍片收音功能。
SX700 HS（右）及SX600 HS（左）天涯機，適合旅行使用。	全天候機仔PowerShot D30，支援25米防水功能。	今年「鏡頭大晒冷」以玻璃櫃密封，而鏡頭產量突破1億支！
鏡頭體驗區畀參觀者任試長炮，連600mm、800mm等大炮都有得玩。	最抵讚係海外機種展示區，牆上貼有日版與海外版的對照表。	穿戴式眼罩Mreal HH-A1，可於現實中呈現虛擬3D影像。