昨天提到朋友丙的老公在「美國西岸」健身院兩度被偷去底褲，還因為屁股太靚而在更衣室慘遭狂(目及)，要躲在淋浴間才夠膽把底褲脫掉並掛到浴簾外，卻讓底褲賊有機可乘。丙小姐續說：「我老公第一次被偷底褲時都好嘩然，第二次就好平靜，仲傻到走去問門口管理員阿伯有冇見過有人攞住佢條底褲，你話邊個會睬佢？」
戊先生像律師替辯方發言：「整間更衣室得你老公將底褲『揚』出嚟，人哋唔偷佢偷邊個？」乙小姐福爾摩斯上身：「會唔會你哋選擇嘅底褲款式太矚目太引人犯罪？」我則化身山寨版佛洛伊德：「你老公被偷底褲兩次，會唔會再有第三次？好似被性侵犯嘅受害者，通常會再受侵犯……」甲小姐擔演CSI主角：「你老公會唔會在被偷底褲中，得到莫名其妙嘅快感，開始沉淪下去，不斷購買款式好誘惑嘅底褲，博被人再偷？」我們嘴巴很賤，肚子笑到快破。
也許說話推得夠盡，丙小姐竟爆老公陰毒：「其實我話老公被其他男人(目及)屁股有乜所謂？咪當係Compliment囉！佢上跑步機跑步時，都斜睥身邊啲女仔一邊彈吓彈吓一邊波濤胸湧啦。」我說：「吓，乜佢(目及)『波浪』？咁佢真係應該Holistic一啲，間中畀人睇睇個『靚股』，以保持世界生態平衡。」真的，我相信Give & Take，你要拿取，便要付上。你當我阿Q都好，我相信為富不仁者，一定要付出代價，有帳不付就由下代去受。
旅遊飲食寫作人