練跑踩車 靠Apps做鐵人
秋高氣爽，最啱就係做運動強身健體，如果大家好似小記咁平時鍾意跑吓步和踩吓單車，iPhone有唔少專為運動愛好者而設的路線及計時Apps，幫大家統計同記錄每次運動的數據資料，日日Keep住做，跑馬拉松甚至三項鐵人都冇難度！
撰文 ：李家俊 攝影 ：郭凱敏 模特兒 ：Jo Jo（Inspire）
個人路線時計《Cycle Watch》售價：免費
唔好睇《Cycle Watch》個名，以為只係單車友先啱用，其實佢有齊步行、跑步和單車3種時計。不過介面就比較簡單，只有距離、卡路里消耗、速度和水平度統計資料，一按「Start」即可進行記錄。另外，《Cycle Watch》備有GPS地圖定位功能，配合平面街道圖或衞星圖，身處甚麼位置都一目了然。
內置指南針《Motion X GPS Lite》售價：免費
《Motion X GPS Lite》給人功能齊全的感覺，事實上免費的Lite版已相當夠用，備有經緯度顯示，精確度達小數點後6位數字。加上此軟件內置GPS衞星定位及指南針功能，並可以設計路線作行程時計，不止是跑步或踩單車，就連露營等戶外活動也可以用到。
運動分類多《RunKeeper》售價：免費
唔好被《RunKeeper》個名呃咗，其運動分類可說是眾多Apps中最多最齊，除了一般的跑步和單車外，仲有滑雪、溜冰、賽艇、游水等，總共有13種咁多。不過，《RunKeeper》的功能較為單向，主要用來統計時間、活動距離和卡路里消耗，適合練習計時賽使用。
車友路線分享《iMapMyRIDE》售價：免費
《iMapMyRIDE》是專為單車友而設的工具，可以自訂單車路線圖和GPS衞星定位作個人記錄外，更可與朋友一起使用，把各自行走過的單車路線公諸同好，互相觀摩分享。最近《iMapMyRIDE》還新增心跳記錄功能，對於留意健康的人士相當實用。
聽歌做運動《LYR-Free》售價：免費
好多人都有聽歌跑步的習慣，《LYR-Free》係少數擁有播歌功能的運動App，仲可以自己揀定Playlist，一邊跑一邊聽喜愛歌曲，自然跑得更落力啦！此外，《LYR-Free》可以設定「Heart Rate Zones」如帶氧運動、消脂運動等，好讓大家發揮最佳運動效果。