牛柳龍蝦雙重滋味

人都是貪心的，揀西餐主菜既想要牛扒又想食龍蝦，小記認為Surf & Turf最深知食客心，因為由即日至10月底來柏寧酒店RIVA餐廳，便可嘗到特別推出的牛柳龍蝦四道菜晚餐。頭盤可選擇法國白雞胸拼波士頓龍蝦凍批，或香煎帶子伴炸鴨肝配燴大黃根及金巴利汁；餐湯則是耶路撒冷菊芋忌廉湯配鮮蝦牛尾雲吞及香草橄欖油；主菜可從慢煮牛仔柳伴烚波士頓龍蝦及扒澳洲安格斯西冷伴鮮鮑魚之間二選一，最後以甜品桑莓朱古力慕絲作結，感覺圓滿。