認清泊車陷阱樹底易中獎

揸車出街其中一個令人煩惱嘅問題，就係搵地方泊車。原來，無論露天或有蓋停車場，甚至只泊喺馬路邊，都存在一定程度嘅隱憂，隨時令車主有金錢損失，以及帶來好多不必要嘅麻煩，後果可大可小，大家認真要留意呀！

爛地車場危機處處

香港有好多露天停車場，坊間俗稱為「爛地」，由於收費便宜，故吸引不少車主幫襯，不過喺呢啲地方泊車，其實有好多問題要注意o架！最常見就係輪胎中招，要知道「爛地」滿布危機，好似玻璃碎、鐵釘等，有機會傷害輪胎，場內工作人員亦甚少進行清理，所以喺泊車之前一定要睇清楚。

另外，有啲車主以為樹大好遮蔭，泊喺樹底就唔怕架車曬到熱辣辣，其實喺樹底下好容易中招，例如枯葉、昆蟲屍體，以至雀鳥便便令車頂中頭獎等，不但令人煩擾，更會影響車身油漆。當然，被猛烈陽光直接照射車身都唔好，紫外線同樣對油漆造成傷害，長期暴曬會令車身變得暗啞無光，甚至甩油，打蠟都冇得救，建議搵個車套遮遮佢！

放大圖片	汽車停泊喺樹底下，隨時搞到滿車枯葉、昆蟲屍體等。	汽車長期停泊喺露天停車場，日曬雨淋，隨時搞到甩油o架！
露天停車場欠缺清理，地上硬物垃圾，如鐵釘、玻璃碎，對輪胎構成威脅。

記得留意車場出閘位嘅防撞柱，撞花車身就無謂啦！

有蓋車場慎防撞花

至於去到有蓋車場泊車，話晒有瓦遮頭，固然有保障，不過仍然要注意其他問題。首先係入場之前，記得Check清楚八達通有冇足夠餘額，事關時下多數停車場都只接受八達通付款，若然到閘口先知唔夠錢，咁就頭痕喇！

部分停車場嘅車位比較狹窄，車身大啲都好難泊，就算夠位泊，都要考慮自己及其他人上落車時有冇足夠空間，自己就話可以盡量遷就，若然畀隔籬車開門撞花就唔抵啦！此外，有啲人泊到架車出晒界，一旦發生碰撞，到時仲可能被要求賠償o架！到離開停車場時，記得留意出閘位嘅防撞柱，一不留神，輕則弄花泵把，重則撞爆頭燈，認真要注意呀！