13.1吋VAIO Z139輕．型藍光

要造出一部規格強勁嘅手提電腦並唔困難，最難係將各種高科技裝嵌在一部既型格兼輕巧嘅機身之內。試想像頂級Core i7平台、256GB QUAD SSD、全高清靚芒以及Blu-ray影院播放效能，齊集晒喺這部僅重1.44kg的Sony VAIO Z139身上，開價兩萬幾都算合情合理！

出街睇Blu-ray，仲可以打機！售價：$22,980

Core i7配SSD極速效能

VAIO Z作為Sony手提電腦的旗艦系列，剛到埗的Z139更是當中最Top型號，可想而知機身規格同功能有幾強。記得VAIO Z初面世時將QUAD SSD列為一大賣點，這部Z139當然唔例外，用上4塊64GB SSD組成256GB高容量固態硬碟，速度比傳統筆記簿快之外，操作時亦較慳電和涼快，並擁有極高防震效能，對強調流動性的Z139嚟講有好大幫助。新機另一賣點係用上Intel Core i7-640M處理器，效能比上代Z129進一步提升，支援Turbo Boost升頻技術，令打機睇片更順暢。

13.1吋全高清靚芒

圖像處理亦係Z139強項之一，13.1吋屏幕用上全高清LED背光技術，尺寸雖小但畫質卻相當理想，可顯示出Adobe RGB 96%色域，用來執相或設計工作都相當啱用。新機還搭載GeForce GT 330M獨立顯示卡提升圖像處理效能，滿足喜愛Blu-ray電影、剪片和打機玩家要求，還可因應工作需要切換到較省電的Intel HD Graphics內置顯示卡，甚至可將操作模式設定至「Auto」，由電腦幫你揀選最合適的設定，在慳電與速度之間取得平衡。

VAIO Z系列只有最高階型號配備SSD及Blu-ray機，當然售價亦唔會低。

同其他VAIO一樣內置MS同SD雙插槽，最吸引是機身只有23.8mm咁薄。

解像度只得640×480嘅Motion Eye略嫌未夠高質素。

1.44kg輕巧體貼設計

要將影院級高階配置放入輕巧的Z139已有一定難度，難得Z139機身設計既Stylish又輕便，特別用上碳纖維外殼，手墊部分更由原塊鋁片切割而成，當遇到碰撞時能保護機內硬件安全。同時機身採用纖薄舒適設計，例如Blu-ray碟盤用上超薄款式，Full Size獨立按鍵更見心思，令用家打字時冇咁易疲勞，而且身處低光環境時，鍵盤更識得自動透光，搭飛機或在陰暗環境工作都唔怕按錯掣，認真體貼。

若嫌13.1吋芒睇Blu-ray電影未夠舒適，可用HDMI接駁大電視睇戲。	Z139同其他Z系筆記簿一樣行Hybrid模式，可因應情況揀選不同的圖像處理器。	內置Blu-ray 光碟機，既可睇BD電影，亦能燒錄各種格式DVD。
13.1吋全高清LED芒，色域比一般筆記簿更廣，還預載快捷列啟動程式。	機面設有多組快捷鍵，同時亦一如Mac機設有光碟退出鍵（紅圈）。	Z系線條甚有美感，並配上設在機側的圓形開關掣。