12吋轟天龍　紋身谷肌

年過六旬的荷里活影星雖然不少，但仍能全場由頭打到尾、拳來腳往打真軍的動作巨星，除了「龍哥」史泰龍仲有邊個？今年上映的《轟天猛將》（The Expendables），年屆64的龍哥依然有心有力，槍戰格鬥絕無欺場，尤其是碼頭狂奔再跳上飛機一幕，即使十八廿二都未必敢做。為向這位長青不老的巨星致敬，Hot Toys出盡十二成功力，炮製出12吋的Barney Ross。

圖為試辦款式，與正式版或有少許分別。<br>相比以往的包膠Body，龍哥素體採用兩截設計，擺甫士自然更靈活。

圖為試辦款式，與正式版或有少許分別。
相比以往的包膠Body，龍哥素體採用兩截設計，擺甫士自然更靈活。

軍裝便服做到足

由龍哥飾演的Ross，是僱傭兵團The Expendables的領軍人物，在電影中既會全身特種部隊裝束上陣，強攻海盜和正規軍，亦曾以平民裝扮遊客，深入美洲小島偵察。Hot Toys的Ross就有齊這兩種服飾，剪裁稱身不在話下，細節上亦有高水準表現，例如仿皮槍套的質感像真度極高，軍靴亦做足舊化塗裝，就連睇戲時未必留意到的頸鏈吊墜，Hot Toys都照樣做齊，共有十多件Parts咁多，抵買程度可見一斑。

彩繪紋身甫士掂

除了重「量」，Hot Toys對「質」的要求更加講究。為求展現Ross上半身的彩繪紋身，素體選材參考了同廠《Iron Man 2》鞭狂設計，令胸口、膊頭和背部的紋身，統統清晰可見，上半身更維持良好的活動能力，無論手執長槍或短火，都可擺出自然的射擊甫士。

長短火有齊，而且軍裝和便服兼備，喜歡大堆頭Parts的玩家應該滿意吧！

軍牌和十字架吊飾細如芝麻的部件，Hot Toys一樣落足心機炮製。

最神似龍哥頭雕

頭雕方面，其實由《Rambo》三部曲到《Rocky》第三、四集，Hot Toys已累積了成熟的「造龍」經驗，五官輪廓自然拿捏準確，至於Ross的皮膚質感以及眼神表達更大有進步，例如眼紋、法令，甚至眉毛和鬍鬚的雕工，都猶如米雕般精細；眼神就夾雜了睿智和滄桑感，切合Ross的老兵形象，若然形容這是史上最神似的龍哥Figure，相信沒有人反對吧！