NX100 i-Function 一按一扭靚晒!

大部分EVIL（無反光鏡可換鏡頭）相機唔係黑色就白色，搞到見來見去都係差唔多樣。Samsung又再打破慣例，推出流線型嘅NX100，除咗黑同白，仲有啡色揀，單睇個樣已經吸引，而且Kit set都係五千幾蚊有交易，抵玩！

撰文：溫小儀　攝影：陳世昌　查詢電話：3698 4698

APS-C單反質素

相信留意相機消息的用家，會記得Samsung年頭推出的NX10，成為首部以APS-C作感光元件的EVIL相機。Samsung事隔多月又再推出更細的NX100，勢要於EVIL市場分多一杯羹。NX100採用APS-C作感光元件，較M4/3機種的大六成左右，足以提升相片質素，更為細緻清晰；而且機身及鏡頭以人體工學設計，不會頭重尾輕，令整體平衡感較好。

放大圖片	NX100機仔細細，卻採用3吋顯示屏，方向鍵同樣設置轉盤，挑選功能更容易。

設定扭幾扭

為配合NX100簡單易用的特點，配備的鏡頭都有獨特i-Function按鍵，可輕鬆快捷地進行拍攝設定。當使用手動拍攝模式時，按下鏡頭的i-Function按鍵，便可切換要調校的設定，如光圈、快門及ISO等，再扭動對焦環就能調校數值，還提供即時效果預覽，影靚相話咁易。當然，大家仍可在機背進行拍攝設定，滿足不同習慣的用家。鏡頭還加入圖案，告訴大家此鏡最適宜拍攝甚麼題材，相當體貼。