久違了的鄧一君（John），仍是一張長不大的孩子臉，與小模特兒玩耍，像大哥哥似的，原來他早於兩年前已榮升爹哋。
「以前嘅我，唔識得與人相處，更遑論關心別人，直至認識了現任太太，孤僻性格開始融化，囡囡Kristen出世後，人生更出現180度轉變……」
由娛樂圈轉戰金融界，加上成家立室帶來了責任感，令眾人眼中的大男孩變得成熟了！「以前唔識得關心別人，認識了太太，開始冇咁Cool；有咗Kristen之後，自覺性格變晒，見到囡囡得意地笑，自己都笑埋一份，嗰種開心同見到一架靚車好唔同，真係前所未有！」女兒的出現，更讓阿John感受到家庭溫暖。「同屋企人嘅關係一直好疏離，大概兩個月才會見父母一次，女兒出生後，老人家經常傳授育兒秘笈，彼此關係改善咗。原來湊BB有好多細節要注意，例如替BB沖完涼要立即抹乾身體，否則好易冷親，多得爹哋媽咪不斷提醒。」
講到教女心得，阿John自言沒有一套特定方法，只把自己嘅童年經驗作參考，提醒自己勿讓女兒重蹈覆轍。「以前自己行錯咗，當然唔希望囡囡跟住走！我同太太已經商量好，會畀佢接觸樂器、電腦、游泳等興趣班，但唔會強迫女兒學太多嘢，因為我覺得只要搵到強項，一樣已經足夠。例如女兒對數字敏感，我會畀機會佢發揮呢方面嘅潛能，總言之，培養興趣以貴精不貴多為原則。細個時，我就係學得太多嘢，小提琴、鋼琴、吹笛、畫畫、打鼓……年紀大啲，又去學設計、電腦……感覺上學咗好多，但就冇一樣精。」
這一代的孩子不愁物質，卻又太過注重物質，阿John作為理財顧問，希望給女兒灌輸正確的價值觀，並會教她如何善用財富。「好多家長會喺物質上畀小朋友最好的，但我寧願滿足女兒心靈上嘅需要。由於學問係最寶貴嘅資產，所以我現時每個月都會為佢儲一筆教育儲備，作為禮物，希望佢日後毋須借錢也讀到大學。」阿John又計劃在女兒讀小學後，訓練她養成儲蓄習慣。「到時我每個月會畀佢一百蚊零用，並規定要將20%儲起來，10%幫助有需要嘅人，希望佢養成節儉、助人嘅美德，並懂得為使錢作預算。」
能夠令阿John的性情大變，其女兒Kristen必定有其過人魅力，雖然訪問當日，無緣見到，但單看其生活照，已感受到可愛一面。
不少家長都樂於見到小朋友上鏡做童星，阿John對童星生活卻沒有半點眷戀，因為10個童星9個無朋友，由童星轉為演員以後，對身邊的人和事變得漠不關心。「我嘅童年好寂寞，自己一個小朋友喺片場，整日接觸大人，心入面諗嘅事情好複雜，小學年代已經跟同學有代溝，我當咗自己係大人，其他同學做嘅嘢、玩嘅嘢，我只覺得好低能。成年人嘅思想，被困喺小孩子嘅身軀，身心發展注定唔協調。我對女兒冇乜特別要求，唯一希望佢唔好走去做童星。」
撰文：司徒德琳 部分攝影：郭凱敏
部分相片：由被訪者提供
模特兒：Nicole、Rachel
場地提供：Super Champ Playgroup Centre