波波壽司連掃十球！

壽司飯味道豐富

其實，波形壽司名為Bubbles Sushi，是按餐廳Bubbles Sushi的所屬公司命名，並非為球賽而來。食慣平日的長方形壽司，不妨改試入「球」滋味，眼見球球足料，壽司飯混合了大葉碎、薑、香草及芝麻等，比平日的壽司更有豐富口感及味道，而面層鋪上新鮮刺身，像帶子、黑目鯛、海膽、三文魚等，色彩繽紛，睇見就開心。

6 Ho先來一輪快攻，搶食美味的波波壽司：「我好鍾意食日本菜，每個月平均都食一至兩次，首選會係刺身，因為夠鮮味，咪睇壽司波細細粒，其實質感實淨，仲味道豐富啲，閒閒哋食十球八球啦！」食得清脆利落，6 Ho轉眼已經掃走十幾球，超額完成，仲要求半場休息，抖一抖再食過。

Bubbles Sushi $120/6件、$180/12件 招牌菜「球」「球」足料，壽司飯混合了大葉碎、薑、香草及芝麻等，味道更豐富，飯面更鋪上新鮮刺身，像帶子、黑目鯛、海膽、三文魚等。	香魚鹽燒 $120 此魚多肉又嫩滑，還帶有特別果香，燒至9成熟最好，蘸點以Ta De葉炮製的酸汁，更清新美味。	櫻花蝦餅 $78 將櫻花蝦、三葉、南瓜條及番薯條等混合香炸，鬆脆美味，蘸點奉上的蝦鹽，即起提鮮作用。

刺身櫃一目了然

之後6 Ho開始轉攻刺身，壽司吧位置備有一列刺身櫃，還裝上LED燈，有甚麼是日精選可謂一目了然，特別推介坊間少見、紫色的葡萄蝦，肉質爽甜，還綴以幾顆像葡萄的蝦籽；鰻魚苗條條不足一個月大，亦已變成桌上佳餚，入口滑潺潺，甚有魚味，再配作「湯底」的淡酸汁，非常開胃。

而餐廳另一主打則是關西料理，師傅表示：「關西菜較為傳統，當地天氣凍，大家會偏愛食濃味菜式，還會按時令品嘗，做到不時不食。」6 Ho夾齊香魚鹽燒、櫻花蝦餅及和牛他他燒：「食嘢好開心，係一種減壓方法，幾鍾意食鰻魚苗，質感得意，又有酸汁做湯底，和牛他他燒有青瓜及大葱絲伴食，味道幾平衡，菜式水準好平均。」

葡萄蝦 $90/隻 夏季當造的海鮮，紫色外殼甚為吸引，還有幾顆如葡萄的蝦籽，肉質爽甜鮮味，絕對是消暑佳品。	和牛他他燒 $120 以鹿兒島A4和牛入饌，選上油花較少的膝部，牛味濃郁有嚼勁，薄薄的一片捲以大葱絲及青瓜絲，平衡一下味道。	餐廳有型格的鋁管燈、玻璃Feature Wall，配以高高的卡座，感覺很時尚，有別於傳統的日本餐廳。

壽司外形大不同

長扁形箱押壽司

這充滿日本關西風味的壽司，壽司的飯粒因經過擠壓，因而令口感較紮實。師傅會將材料逐一放入特製的箱內，再蓋箱、壓飯，輕易的便把飯糰壓了出來，最後再分成數細件就是了。

扇形江戶前壽司

江戶前壽司被視為正宗，話說江戶前即指東京灣前，海產豐富，約在江戶時代，便有人將新鮮撈獲的魚類用來做手握壽司。這種壽司與別不同，例如魚生剛好蓋着飯，飯糰呈扇形，壽司飯入口鬆化，帶點煙韌。

長扁形箱押壽司

扇形江戶前壽司

6 Ho 快攻入球

去親日本餐廳，魚生、壽司一定係首選，尤其愈濃味、愈多膏的就最鍾意，好似呢種葡萄蝦夠晒鮮味，食落彈牙！波波壽司好多款式，可以同朋友仔分享。

撰文：楊淑英 　攝影：陳富權 查詢電話：3746 9999