大宇宣萱談婚論嫁

宣萱、陶大宇自十五年前合作《壹號皇庭》後，「螢幕情侶」形象深入民心，二人於最近正播映的《掌上明珠》，再度合作可謂駕輕就熟，不過今次二人演一對鬥氣情侶，「大表哥」和「二表妹」最後鬥出真感情。

日前這對「舊情人」難得碰頭做專訪，二人甫「埋牙」已見默契，不時交頭接耳，繼而傳出大宇招牌的哈哈笑聲，整個訪問場地都歡樂洋溢。愛戲弄人的大宇，面對宣萱當然不放過機會，取笑對方揀男友換了口味，不愛食「中餐」改吃「西餐」，身旁的宣萱竟一副冧樣說：「呢個『西餐』真係幾啱我，之前遇唔到（男友），我半放棄狀態嘞，不過佢真係幾啱我，我哋乜都講，換轉中國人可能有啲顧忌！（好事近？）拍拖八個月咋，不過我都有諗嘅！」

好友助走出陰霾

看見人家覓到真愛，身旁的大宇都回復正經，語重心長地給老拍檔送上祝福，並表示每個人對結婚的需要各有不同，有些人很需要Family（家庭），他說：「如果計劃要小朋友，當然要快啲去結！但相反，有啲人比較適合單身。」其實大宇講來講去正想表達自己目前的狀況，大宇甚至用「大師兄……我返嚟嘞！」來形容自己「狀態大勇」，故有「復活」的感覺。

與前妻黃慧寶離婚四年，大宇稱是他人生的一個轉捩點，雖然一度陷於低潮並失去信心，但他獲不少朋友為他進行心靈治療，終於走出陰霾。大宇說：「我對自己呢個階段嘅狀態好滿意，唔開心嘅日子過去，再多嘅負面嘢都傷害唔到我，有好多傳媒仲繼續問我緋聞（郭羨妮）、同前妻復合等問題，復合只係傳媒吹噓，我從來都冇講過，阿寶（前妻）依家生活得好好，我都係，大家互相會問候對方，呢種係離婚後仍可做朋友嘅情操，傳媒都係人，佢哋唔會唔知，可惜有啲傳媒硬係要將件事寫得醜惡嚟配合需要。」

放大圖片

放大圖片

享受戲中「拍拖」

大宇的「淌血」感情經歷，宣萱作為老拍檔看在眼裏，卻不敢輕舉妄動。她說：「我都知嗰時大宇辛苦，但我唔會再煩佢。我哋係好拍檔、好朋友，好多嘢都在心中，好多問題真係要自己去解決，要用時間，嗱！你睇大宇咪幾開心。」

正因為有宣萱這個體貼的紅顏知己，大宇很享受與對方在拍戲時「拍拖」，宣萱亦乘機表白：「當年我同大宇拍《皇庭》時，我都會鍾意佢架，唔多唔少都要鍾意個男主角，先可以投入角色。」

原來，演戲方面，二人心目中的頭號情侶對手，都離不開對方，他們感情之好，據宣萱講，她拍《掌》是因大宇而接，以及二人還愛鬥嘴便是例證。她說：「我拍戲唔係揀劇本先，係揀對手先，好似拍《掌》前，我聽到大宇個名，我就二話不說『接吖！』因為，我份人要講溝通，做戲就更加要呢份溝通，咁先演得好，演得舒服。」

大宇回憶當年與宣萱的點滴：「我哋十五年前拍《皇庭》至依家拍《掌》，相處上都係開開心心，宣萱係有變化，但係好嘅改變，以前佢擺明係ABC，但嚟咗香港拍戲咁耐，都適應咗香港人相處文化，以前發小姐脾氣，依家又會變得成熟……」宣萱聽到此時，即急不及待補充說：「大宇就冇乜變囉，把口仲係咁衰！」完全展現冤家式友情！

放大圖片	放大圖片	放大圖片

自由身‧自由講

宣萱受訪期間多次表示希望再與陶大宇合作，但大宇自完成《掌》劇後，已跟無綫沒有合約，目前自由身的他，向宣萱表示，要合作就「出面見」。問到為何沒有跟無綫續約？無奈的大宇說：「未約滿前，我畀無綫投閒置散咗一年，覺得無癮咪唔續約，（覺得無綫將機會畀晒『親生仔女』？）又難怪嘅，『親生仔女』係『行貨』有保養，當然得到特別照顧，而我係『水貨』，咪冇保養囉！不過，無綫都好好，賠足錢畀我，咁大公司，唔通爭我哋啲演員咩！」

採訪：影視組

攝影：吳文聰

場地：STEIK WORLD MEATS