改編自經典電玩遊戲的新片《波斯王子：超時空之戰》即將上映，《斷背山》男星積佳蘭賀不再斷背，變身勇士誓保江山，練大隻、學耍劍、兼飛簷走壁！
記：記者 積：積佳蘭賀
記：點解你會有興趣拍呢部系列電影？
積：首先今次嘅角色同我以前做過嘅好唔同，而且大家都估唔到我會拍呢類戲，所以好想試吓！其實《超》唔係改編電玩咁簡單，佢本身都係經典嘅英雄故事，激動、真實、充滿轉變等。
記：開拍前有冇玩過呢個game，演經典角色有冇壓力？
積：都有壓力o架！因為你早已知道個故事同埋遊戲中王子嘅個性，不過我覺得都幾有趣。其實壓力同演一個真實存在嘅人一樣咁不可思議。細個時都玩過呢個game，我認為最重要係將啲唔真實嘅場面帶到真實世界。
記：你點樣建立角色，加咗咩入去？
積：對我嚟講第一樣就係生理上嘅建立，操fit體形、學耍劍、之後仲要了解戰士嘅心理等等，我知道捱得過呢part就過咗一半，剩低就係對白，因為我喺戲度要有英國口音。
記：開鏡前接受大量嘅訓練，要唔要配合飲食？
積：基本上只係大量嘅鍛煉，不停咁跑同做好多唔同運動，我唔多鍾意困喺室內，所以好多時都喺戶外訓練，就好似準備去打仗咁，不過因為遊戲裏面個個都身手敏捷，唔止鬥劍咁簡單，仲要飛簷走壁。
記：拍呢類電影邊部分最有趣？打鬥場面定係捱熱沙漠騎馬？
積：兩樣都好正！記得細個時走出門口同朋友仔講「我扮呢個，你扮嗰個，我哋對打啦」，喺片場就係日日做呢樣嘢。其實邊打邊交戲都幾難，但亦係我最享受嘅部分。加上我鍾意熱，覺得摩洛哥個沙漠好唔真實，我哋就好似拍緊部獨立電影咁，四圍走。
記：好似得你冇投訴太熱？
積：因為佢哋來自英國，我就來自南加州，早就講過唔會埋怨，我亦做得到。我覺得沙漠就好似一片淨土，係個好地方去思考問題，當然你要有足夠水同食物啦。
記：如果《超》成功，會否再拍同類型嘅戲？
積：好難講，因為拍完呢類大片再去拍細規模嘅電影，心態上會好唔同，同埋拍大片會畀你崇高嘅感覺，每日都充滿刺激。有時我會呻攰，話唔會再拍呢類戲，但身邊嘅人就會講「你休息兩星期，就會心郁郁想再拍多部」。
積佳蘭賀為了新片《波斯王子：超時空之戰》的角色下了不少苦功，除了勤做gym練得一身鋼鐵般的肌肉之外，還要學騎馬及耍劍。最近電影公司就公開一段積赤裸上身與導師格劍的幕後花絮。
雖然每日定時定刻練武，但積指如果開拍續集的話他亦唔介意重新接受訓練。儘管傳媒對積的大隻新look讚不絕口，但女主角「前邦女郎」Gemma Arterton就承認積不大吸引她。她表示：「積係個好搞笑嘅人，但佢一工作就好嚴肅。佢好勤力、係個完美主義者，但我已經訂婚，所以我對佢冇乜feel！」
文：外娛組