憑藉D級身材成功搶灘的趙碩之（Wylie），面對新一浪的「警鐘胸」Jessica C.（JC）及高海寧等的衝擊，她直言並不介意聲威不再，更點名看好二人能在2010年成功突「圍」。Wylie入行以來是非多多，她自知口沒遮攔，得罪人多，故在新一年她要一改惡習。
擁有D級身材的趙碩之，08年一出道即大膽推出個人寫真集，由於寫真集內的圖片極為噴血，更不乏出浴照，在o靚模寫真集還未大行其道的當時，成功殺出新血路，更成為當時得令的「峰」頭躉，亦因此被冠以「趙碩G」的稱號！
但隨着「後起之秀」愈來愈多，09年先有o靚模周秀娜以性感形象及誘惑攬枕成功彈出，09年尾又有「警鐘胸」Jessica C.及高海寧相繼以豐滿上圍搶灘，再加上與師妹尹蓁晞（Yumi）的是非被公司雪藏兩個月，Wylie可謂四面楚歌，前路看似崎嶇。
剎那光輝亦永恒
走出雪櫃後的Wylie，聲勢好像大不如前，不過她卻有另一番看法：「我又唔覺得自己依家沉寂咗，亦唔覺有好多競爭對手，對於我嚟講，競爭對手係唔存在嘅。雖然喺包裝方面，我同周秀娜、JC好似好相似，但其實每個人都有唔同嘅性格同特質，加上走嘅路線又唔同，所以根本唔存在競爭。」
向來甚有自己一套的Wylie，更大方預言高海寧及JC將會是2010年最煞食的「峰」頭躉：「我覺得冇話邊個取代邊個，07年有動漫Maggie，08年就畀我好彩做到代表人物，至於09年頭就有周秀娜，之後又有JC同高海寧，每一年都好似有個代表人物咁，我夠膽講，2010年絕對係JC同高海寧嘅天下。我唔會介意自己依家畀人覺得冇代表性，起碼我曾經喺娛樂圈歷史度成為一時佳話，一剎那光輝都可以係永恒嘅。」
口沒遮攔得罪人
直腸直肚雖然容易得罪人，但通常較為樂觀，Wylie亦不例外。她笑指09年看到o靚模寫真集掀起熱潮，自己雖然沒份參與，但卻竟然有說不出的成就感：「大家唔好忘記我係第一個以o靚模身份出寫真，而又可以賣到四萬本咁好成績喎！我好慶幸當初自己揀呢條路走，令到大家知道，原來出性感寫真集，都可以係邁向成功嘅新出路！其實我從來唔覺得自己係靠拋胸成名，但我承認我喺08年創造咗一個奇迹囉。」
Wylie除了令人想起她的豐滿上圍外，無日無之的是是非非亦惹人關注。對於入行至今經常是非纏身，Wylie笑言是一個很好的經驗，不過好的地方並不是因為見報率多，而是上了寶貴的一課：「睇番舊年嘅是是非非，我都承認自己嘅表達能力唔好，成日講嘢唔收，所以喺新嘅一年，我想衷心向公司同埋啲師妹道歉。」
萬人迷備受愛戴
雖然自認口沒遮攔，不過Wylie仍有不忿的地方：「其實有樣嘢我好想講，我並唔係要針對咩人，但是非嘅嘢，除咗有時係我自己攞嚟之外，亦覺得某啲時候係畀人擺上枱借嚟做宣傳，不過我唔介意人哋咁做，因為我明白keep住見報率，係喺呢個圈嘅生存之道，大家都係搵啖飯食啫。」
相信很多人都會疑惑，開口埋口得罪人的Wylie，未入行前的人緣是否很差？豈料Wylie卻表示，她讀書時是萬人迷，很少有同學不喜歡或針對她：「我細個讀女校，而我又比較男仔頭，加上仲係玩劍擊嘅，所以好多女仔都視我為崇拜對象。所以無論我講嘢幾直都好，啲人都唔會戴有色眼鏡睇我，但可能就係因為咁，搞到我出嚟做嘢之後，都好似以前咁有嗰句講嗰句，結果搞出好多大頭佛。就係因為以前啲同學咁錫我，搞到縱壞咗我，依家我衰過跌過，反而個人清醒咗。」
自揭攣直之謎
Wylie入行後一直沒有緋聞，傳來傳去，都只是她讀書時與女仔拍過拖，加上性格男仔頭，自然令人懷疑她究竟是攣是直？問到Wylie有否愛上過女孩子？她斬釘截鐵表示：「冇！（點睇咁多女仔崇拜你？）開心咯！細個邊有諗咁多嘢，淨係覺得次次比賽都有大班同學嚟支持好開心，就好似依家有fans支持我嘅電影，我都會好開心架，唔通我又覺得啲fans鍾意自己咩？」
唔記得dry幾耐
雖然Wylie一路「直」走，但她直認確實曾有女同學向她示愛，而她亦斷然拒絕：「去到示愛就好驚喇！梗係即刻拒絕啦，我係鍾意男仔，仲有拍過拖，我都成日講我啲男朋友，但唔知點解記者朋友好少寫，就算寫，都好似冇人記得咁。其實依家冇緋聞都正常，因為我真係dry咗好多年，耐到都唔記得有幾耐，冇計，惟有隨緣啦。」
「咪神」爭霸戰
趙碩之「欽點」Jessica C.（JC）及高海寧接棒，不過綜觀近日走勢，「新貴」梁政珏及苟芸慧亦同樣「乳」出驚人，新一代「咪神」大戰一觸即發！
JC因為與葛民輝合拍相機廣告而一鳴驚人，不過年僅廿一歲的她，早於05年已擔任洗頭水廣告女模，加上鬼妹仔性格，於大小內衣騷毫不錫身盡顯曲線身材，近日飆升為女模新貴。
08年參選港姐的高海寧當時爆出隆胸疑雲，更因曾拍攝半裸照一度成風頭躉，「封胸」一段日子後最近她「重錘出擊」，出席大小活動經常酥胸半露，不過由於生得高大關係，經常被指肥腫難分。
至於07年參加無綫藝員訓練班入行的梁政珏，於劇集《美麗高解像》內穿上三點式亮相，被網友封為「TVB真正乳神」，期間她忽然自爆成為討論區內性幻想對象，加上在中環被西裝友調戲而成功出位。
去年以廿五歲「高齡」當選華裔小姐的苟芸慧，於《歡樂滿東華》內以低胸裝亮相，瞬即成為焦點，由於身高五呎七吋，且長相與性感女神林熙蕾相似，刻下已成為無綫力捧花旦之一。
文：影視組 攝：黎志輝
場地：privacy＠銅鑼灣