因為即將出發歐洲，所以甚麼事情都不容有失，天氣忽冷忽熱的流感高峰期，格外小心避免生病，世事有時就是這樣，物極必反！

話說因為我太小心的關係，害怕晚上睡覺之後，「副被」攝親着涼，所以睡前將全屋的門窗關上，再加上近日天氣非常乾燥，睡房擺放了一部放濕機，本來應該萬無一失，誰不知人算不如天算，唉……中招……傷風咳！

這個臨行的晚上，立即用盡所有方法令自己好番！因為真的不想帶病出國，帶病出國是一件超辛苦的事。第一，成個人無晒心情，第二，食藥之後一定是非常呆滯，第三是唔知點解好難好番，所以我雙管齊下中西合璧，飲中藥之餘，再食西藥打針，醫生話我是自己攞嚟衰，焗病自己，有咩理由可以閂晒全屋門窗瞓覺？睡房一定要空氣流通，瞓覺千祈不可以焗住瞓，一定要有適量的新鮮空氣……

其實咁大個仔都是第一次焗到病，以為小心駛得萬年船，點知自己攞嚟衰！覺得自己好白癡……醫生話想快啲好番，唔該你好好休息，有充足的睡眠，不過，謹記唔好焗住瞓！

係，知道啦！醫生。

時裝設計師