蒙嘉慧對有雜誌指男友鄭伊健「三不分」報道表現無奈，表示二人拍拖很開心，暫沒有結婚打算。另外，她又謂不會煲湯給伊健飲，怕毒死對方。
前晚Jimmy Choo為慶祝中環置地全新旗艦店開幕而舉行酒會，當晚更在新店率先發售品牌與Elton John愛滋病基金合作推出的PEP慈善計劃，出席嘉賓有蒙嘉慧、周麗淇、謝婷婷、楊愛瑾以及鄭融等。
蒙嘉慧被問到有指男友鄭伊健「三不分」報道，即指他孤寒、唔肯分手、唔肯結婚，她似是有備而來，表示沒有看到有關報道，但已有朋友致電給她，說：「有人打電話嚟笑我，話我又上封面，我話都慣！（慣咗唔結婚，唔分手，唔分錢？）唔係，只係見新聞次次都唔同，我都覺得悶，我只希望佢哋揀張靚相登。」
請假撐男友
記者問她是否不結婚時，她表現無奈：「我答過好多次，想專心工作，我下個禮拜又有劇開，唔想人以為我掛住拍拖。（有冇計劃結婚？）私下冇傾，總之我哋感情穩定，希望大家留意我工作。」至於男友鄭伊健快開演唱會，會否現身支持？她說：「我會請假去睇，其實拍劇好難請假，係好大件事呀！（煲湯？）有份飲咪煲！（開聲茶秘方？）珊珊識，佢比我更叻，我依家係研究廚藝，驚自己煲得唔好，煲錯毒死佢仲衰。」
被問到二人財政是否獨立？她直認不諱：「我覺得唔好咁執着錢銀，我又唔係冇能力，我重感情多過物質。（有冇問佢身家係咪過億？）我唔會去問，做咗咁多年嘢，大家經濟上有能力，我唔需要隔籬嗰個資助我，唔好扼殺我咁多年嘅能力。」
被讚腳趾靚
至於周麗淇表示自己有過百對鞋，更不時與家姐周汶錡交換鞋着，她說：「我哋嘅Size一樣，但近年就少啲，因為大家鍾意嘅款都唔同。」而近幾年開始穿露趾鞋，並笑言：「有人話我腳趾靚，其實我之前唔露腳趾原因係覺得係私隱。」
文：名人組