氣溫高企，愛犬冇晒胃口，身為「父母」可以點辦？亞視藝人吳嘉星決定走入廚房，自製狗仔私房菜，並以消暑「涼」品西瓜入饌，由瓜肉食到瓜皮，不但解暑又有營，人狗更可分甘同味呢！
為愛寵甘做煮飯婆
今時今日的狗主，對待狗仔分分鐘好過對自己！愛狗之人吳嘉星是「人辦」之一，家有兩貓一狗，不時下廚炮製愛心美食，她解釋：「寵物食得健康啲，身體強壯啲，壽命自然長啲啦！以前，雪橇犬胡椒瘦骨嶙峋，喺朋友提點下，我開始為牠炮製膳食，到街市買新鮮嘅食材，烹調時注意少油、少鹽，家陣胡椒嘅體形已回復正常！其實，由於怕熱、怕麻煩，我好少煮畀自己食，但為咗令貓貓狗狗食得健康，每隔兩日我都會親自下廚！」
西瓜盅蒸雞 賣相一流
冬瓜盅食得多，西瓜盅則較少見，原來只要煮得其法，狗狗一樣啱食！為愛寵甘做煮飯婆的嘉星，這天來到「CoCo 寵物飯堂」惡補廚藝，並成功炮製一款西瓜盅蒸雞。「西瓜入饌既消暑降溫，又充滿營養，菜式設計亦有不少變化。此菜式以原個迷你西瓜上菜，論賣相已先聲奪人，加上雞肉鮮嫩、瓜肉甜美，狗狗實鍾意。最緊要菜式本身冇鹽、冇油，狗仔食得更健康。」
材料：
迷你西瓜1個、雞胸肉（去皮）1塊、鮮冬菇數隻、清水1碗
做法：
1.先用熱水浸軟冬菇，去蒂及切件；雞肉則切件備用。
2.切開西瓜頂部，得出西瓜身及西瓜蓋。
3.把西瓜的瓜肉挖出。
4.將西瓜肉、冬菇和雞肉放入西瓜盅內，注水至蓋過材料，再以西瓜蓋蓋好。
5.將西瓜盅置於瓷製器皿中，以中火蒸約1小時便成。
西瓜生菜卷 清爽可口
西瓜周身都係寶！除了瓜肉，就連西瓜皮的白色部分也可當食材。瓜皮切絲加上青瓜絲、生菜葉等，清新如沙律，消暑功效一流。聽到狗狗食到「爽爽」聲，就知何等爽脆美味啦！
材料：
西瓜皮（白色部分）1/2個、青瓜1/2條、紅蘿蔔少許、生菜葉10塊、原味乳酪5茶匙、麥芽糖/蜂蜜少許
做法：
1.西瓜皮（白色部分）刨去表皮及切絲、青瓜（連皮）切絲、紅蘿蔔（去皮）刨絲，備用。
2.用熱水將生菜葉略燙一下，備用。
3.乳酪和麥芽糖/蜂蜜撈進三絲內，拌勻。
4.三絲釀入生菜葉內。
5.最後捲起生菜葉包裹三絲。
營養師：西瓜抗衰老
對狗狗來說，究竟西瓜有幾「營」？O.I.C. Pet Wellness Center寵物營養師蘇菁菁指出，西瓜益處多，不但糖分適中、無脂肪，瓜肉更含有豐富維他命C、胡蘿蔔素及鉀，有助狗狗抗衰老。此外，不少狗狗似足細路仔，不喜歡喝無味水，夏天好易中暑，更可能出現膀胱生石，蘊含大量水分的西瓜肉，就可幫助牠們補充水分。然而，西瓜屬於寒涼食品，多吃分分鐘會肚屙，一般大型犬的進食上限為每天1/2量杯，小型犬吃1/4量杯便要停口了。
查詢電話：2561 7788
扁鼻狗易中暑
天氣炎熱，最怕狗狗中暑暈倒！據香港愛護動物協會公關及傳訊經理顏綺苓指出，原來，有4類狗狗屬於中暑高危族，分別是年長、長毛、肥胖及扁鼻，前三者容易理解，扁鼻狗則因氣管不好，高溫下容易呼吸不順，因此易中暑。行街街時，主人記得多帶備清水，亦要不時在狗狗身上噴水，以達降溫作用！
撰文：梁淑敏
攝影：張群生
狗狗模特兒：妹豬
查詢電話：9636 7743（CoCo寵物飯堂）