旺角連環爆鏹水彈，搞到行過都要搵瓦遮頭，別以為入到室內就安全，本周另一惡勢力正式登陸旺角，佢就係《變形金剛：狂派再起》入面傳說中的合體建造派破壞者，今次隨着新世紀廣場舉行的新變形金剛展覽及專賣會曝光，當然要第一時間試玩。
撰文：鍾鎮科 攝影：陳世昌
查詢電話：2302 1221
六車合體閃燈發聲
建造派是初代卡通裏罕見的合體機械人，相隔25年重現銀幕已令粉絲們流晒口水，雖然是全膠製品，但手腳身體跟足真實地盤工程車設計，分別由鏟車、吊車、推土車、泥頭車、單臂鏟泥車和田螺車組成，玩埋六神合體，加上學足電影識得開口閃燈和發聲，又點會唔令人心動？之不過車仔唔識得獨立變成機械人，有點美中不足。
4米柯柏文任影相
除了新一批電影玩具將在專賣會現身外，現場還會有《變形金剛》25周年展覽和Cosplay真人表演，最吸引是廠商特別從外國運來4米長、2米高的巨型柯柏文貨櫃車，陪各位並肩作戰免費任影。在現場購買電影玩具滿$150，更可換領摺紙柯柏文模型，全身廿多個紙板部件全由香港粉絲設計，當然要支持一下本地創作。
《變形金剛：狂派再起》展覽及專賣會詳情
日期：即日至6月28日
時間：展覽區 10:00am~10:00pm
專賣區 12:00nn~9:00pm（星期一至五）
11:00am~10:00pm（星期六、日）
地點：旺角新世紀廣場一樓星際廳