一直不肯認熊黛林（Lynn）做女友的郭富城（城城），早前直言Lynn的重要性只排行第四位，比他的老友地位還要低，城城出此言後，Lynn閉關反思，昨日出關，仍笑住讚城城有上進心和孝順，以掩飾她的失寵。
昨日Christian Dior在沙田香港文化博物館舉行「黃金時裳：巴黎與倫敦1947-1957年」展覽會，請來Lynn、杜鵑、劉丹和戴小奕示範最新09秋冬晚裝作預演，晚上的酒會則邀請了舒淇、楊紫瓊和中田英壽等出席，星光熠熠。
瞭如指掌唔使呷醋
Lynn否認因呷醋匿埋，只是到了大陸工作，她沒有看過城城的訪問，對內容卻瞭如指掌，亦知道城城二月曾赴日捧紀香場睇音樂劇，更強調毋須要呷醋，紀香也有睇城城演唱會。對城城將女友排第四位，將她當阿四？Lynn說：「幾好，佢有上進心又孝順，最緊要工作，人哋嘢唔理，我自己都係將工作排第一，想所有嘢都平衡，因每樣對我都重要。（愛情排第幾？）唔知，不過如果有自己家庭一定排第一。」對城城指她與紀香各有各靚，Lynn說每人都要知道自己靚在何處，至於她是身材靚定樣靚？她說：「唔係淨睇外表，要睇整體感覺。」
有傳其經理人Kim將Lynn與Angelababy作比較，棒打鴛鴦導致Baby與陳偉霆分手，Lynn認為只要不影響工作，成年人拍拖要管也管不了，更力撐身旁的Kim從沒過問她的感情事。
杜鵑自恃好命飛罩
Lynn剛從大陸返港並不擔心豬流感（H1N1甲型流感），在機上見到有人不舒服才會戴口罩，防疫等如零。杜鵑跟Lynn不相伯仲，今日杜鵑將飛紐約，上機也不打算戴口罩：「大家放心，我條命蠻好的，我唔驚豬流感，美國嗰邊做嘢都冇人提起，亦冇人戴口罩，如果戴會好怪，爹哋媽咪反而有叫我小心，不過美國嗰邊歌舞昇平，豬流感同沙士唔同，有得醫嘅，冇咁嚇人，我唔去人多地方，注意衞生就得。」
昨日會場展出總值二千萬港元的09秋冬Dior Joaillerie高級珠寶「天堂幻想曲」系列，另外還有Lady Dior手袋、腕錶系列以及五件由巴黎空運抵港的Bar Jacket經典外套，其中兩件由Dior先生設計，三件由John Galliano設計。
文：名人組