在新片中飾演陳奕迅七奶的模特兒姜紫藍昨日大爆模界黑暗面！除曾被模特兒公司老闆邀約到酒店總統套房留宿一宵外，言談間更不時對她掃背、握手臂、摸手仔兼「吹耳仔」，令伊人大感委屈，一度眼濕濕。
曾參選亞洲小姐，現屬AModel Agency的模特兒姜紫藍（Color），最近在新片中與陳奕迅和黃秋生等紅星合作，前途一片光明，卻經歷模界黑暗一面！Color回想當日與模特兒公司老闆到酒店受盡委屈，不禁眼泛淚光說：「佢本來係約我出嚟飲嘢，我覺得OK，因為我同依家間公司就嚟約滿，如果有大公司簽我都好開心。嗰日佢打畀我改去酒店Lobby見面，點知佢只係全程同我傾閒偈，又讚我靚又借啲意掃下我背脊，握我手臂同下巴，仲不時挨到好近，喺我耳邊講嘢，連呼吸都聽到！」
約見面傾閒偈
她愈講愈勞氣，表示自己主動談工作，對方才問她一句「最近有咩job」：「後來我忍唔住問佢『你哋公司諗唔諗住簽人？』，佢冇答，拎咗張匙卡出嚟，我當堂呆一呆，問佢『咩意思？』，佢即刻話唔係我諗咁樣，只係覺得頂樓舒服啲，唔想畀人望住晒。」
Color於是抱着「若有不妥便離開」的心態跟對方上到頂樓，才知原來是一間總統套房。到達後，Color應要求叫了一份三文治和飲料，對方又繼續「吹水」：「之後佢話有嘢做要走，問我夜晚有冇嘢做。我話約咗爹哋食飯，佢就叫我之後返嚟瞓，橫掂間房畀晒錢，聽日先check out。我諗邊有可能book間總統套房畀我一個瞓，於是問佢『咁你返唔返嚟瞓？』佢就伸手摸住我隻手話『你覺得OK就得。』」
摸手仔留匙卡
Color聽罷當然直接拒絕，但對方仍叫她考慮，還留下匙卡給她，不過她當然沒有回去：「危險嘛！匙卡有兩張，佢半夜隨時可以入嚟。佢完全冇開任何條件，又冇話簽唔簽我！」Color表示事後對方仍有致電和SMS她，問她會否嚇怕了，又說有空可以再約過，但Color都沒有應約，對方才知難而退。
對於Color口中的「黑幕」，人氣G模羅凱珊（Kama）說：「咁要報警啦，如果咁出名（個公司老闆）就好唔尋常，應該返公司傾。」上位中的周秀娜則表示：「我未試過有人約呢啲嘢，就算係都應該同埋經理人或者公司同事一齊去，返公司傾都得。我就一定唔會跟人上去酒店房。」諸葛梓岐說：「呢啲事完全無發生過喺我身上，呢行有啲人會利用個女仔想做model、想紅嘅心態，佔個女仔便宜！個女仔應該叫埋朋友或者屋企人陪。」 文：名人組