ABC歐陽靖愛老點

回想數月前大人小朋友都口噏噏「ABC係我係我……」這位美國長大的ABC歐陽靖(Jin)，懂得的中文字十隻手指數得晒，不過他醉心中國文化，特別是飲食方面，過往在紐約，一星期總有一日跟家人飲茶！今日佢就喺呢間有前四季酒店點心大廚主理的點心專門店食個飽！

撰文：鄧善文 攝影：梁偉德

酥皮叉燒包（$12） 外層麵包因前後發酵兩次，所以特別鬆軟，入焗爐前加上薄薄一層酥皮，使表皮脆口像墨西哥包，內裏餡料是自家製叉燒，肉汁夠多夠香濃。	古法糯米雞（$15） 這裏沒有蚊型珍珠雞，只有大大隻的足料糯米雞，油香糯米之中有冬菇、豬肉、腩肉等，還加入了令味道更鮮更香口的膶腸。	臘味蘿蔔糕（$10） 蘿蔔多粉漿少，每底都用上六斤手切蘿蔔炮製，絕不刨絲，由於粉漿少，煎起來會有一點難度。

酒店級點心 請耐心等候

今時今日，街鋪點心的食物質素可與星級酒店看齊，由前四季酒店點心部主管培哥及好彩酒樓點心部主管強哥經營的店子，離遠不見其舖先見人龍，午飯時間不用說，原來黃昏五時後才是等位高峰期，強哥稱這裏價錢經濟，吸引不少朋友放工放學後到來歎點心，也有專登由老遠跑來試試兩大鎮店點心—酥皮叉燒包及潮州蒸粉粿，叉燒包是四季酒店酥皮燒鵝包的變奏，而粉粿是懷舊風格，外皮晶瑩剔透富彈性，餡料切成大大粒，食落香口夠甜味。不過想食正點心要有點耐性，因為全部點心即叫即蒸，落單後等十數分鐘是閒事。

黃沙豬膶腸（$13） 新鮮豬膶以薑絲醃後，放入手拉腸粉中蒸熟，細滑腸粉加上濃郁薑味的豬膶，是舊式點心的經典。	潮州蒸粉粿（$10） 外皮晶瑩富彈性，全因花了長時間去搓，而沙葛、蝦米、花生和豬肉等餡料，刻意切成大大粒，夠咬口。	全部點心都是即叫即蒸，而且更是由培哥及強哥兩位三十多年經驗大師傅親手製作，唔信？自己去睇睇。

周日必飲茶 成點心專家

說到飲茶，Jin原來是專家，在美國生活時每星期定必與家人到唐人街飲茶，他稱那裏不只點心懷舊，就連環境也很懷舊：「在紐約我家常到的那間茶樓，還是推車仔的，點心方面就比較單調，來來去去都是蝦餃、燒賣、牛肉球、鳳爪等幾款，在香港花款多，不過我不懂點心紙上的中文……」Jin把他的飲茶故事Rap成《飲啖茶》，放在上一張大碟之中，而他即將在八月推出的新大碟，會以全新身份登場，就是他即將簽下新唱片公司：「自資出碟當然夠自由，不過我也想拍電影或作其他發展，雖然還未落實，但在這情況之下，有大公司協助總比孤軍作戰更容易。」

「老點」的秘密

添好運是以最懷舊方法做點心，製作過程需花費大量時間和心機。大家在店內食到的，細小如脆皮叉燒包中的叉燒粒，都是百分百自家製、外皮晶瑩剔透富彈性的粉粿皮，搓的時間也要比一般的多兩倍、蘿蔔糕的蘿蔔全用手切粗條，保證夠甜味，最特別的是添好運棄用了搶味的麻油，改為用同樣自製的葱油，培哥稱每日所用來泡油的乾葱頭最少五、六斤，成本雖不菲，但用來煮食、醃肉，味道卻是特別香口。培哥稱這雖然花時間，但食物質素必定比買回來的好，但換來的是每天工作十八小時，開店後三星期，體重已經瘦了廿磅！

查詢電話：2332 2896