鍾嘉欣昨日為春夏時裝騷擔任模特兒，更打頭陣和壓軸出場，她透露不知酬勞有多少。問到是否不想知道自己的身價？她說：「酬勞係公司傾嘅，年尾拎張單就知，有得做已經好開心。（金融海嘯少咗Job？）之前自己放假同拍劇。（少咗搵真銀？）唔會咁諗，拍劇先搵到錢，係長線工作，會多啲人搵我出Function。」
另外，她表示不覺行騷的吊帶小背心性感，她說：「夏天梗係咁，又唔係三點式。（再低胸啲？）出嚟感覺健康就OK。（視徐子珊為勁敵？）唔會，想向佢學習，大家覺得我喺台上唱歌唔識郁，佢有跳舞底子台風好好，好有潛質同自信。（係威脅？）冇諗咁多，神會幫我安排，我係唔會同人爭嘅人。」她自言夠膽學對方穿bra top上陣，但就未是合適時候，歌路不能一下子改變。