陳偉霆被Ana.R姣電即就範

高調宣稱要找男友護花的Ana R.，未知是否被新一代舞王陳偉霆吸引，竟主動向他放電，難得男方非常受落，更謂不怕女友Angelababy呷醋！

昨日陳偉霆（William）、鍾嘉欣、Ana R.及Mandy Lieu等一同出席「7 for all mankind 09春夏時裝騷」。其中半年沒有行騷的William表示十分緊張，在後台更只是面壁更衣，他笑說：「我要同男男女女嘅model一齊換衫，我淨係用個背脊對住佢哋！好怕醜呀，加上我自己又係硬派嚟㗎嘛，（咩叫硬派？）梗係心情硬派啦！」言下之意即心情緊張。

「中門大開」的Ana R.稱十分滿意自己的上圍，更謂絕不會隆胸。	William與鍾嘉欣齊齊為時裝騷任model。	Jocelyn（左起）、Ana R.及Mandy Lieu三美聚首即雞啄唔斷。

唔怕baby呷醋

此時，路過的Ana R.欲叫他「借過」，卻忽然夢露上身風騷姣叫William，他聽罷即時乖乖就範借開！問到是否怕女友Angelababy呷醋？他即說：「佢一定唔會！」他又謂行騷不會守身如玉，不過底線就是不可把T-back掉轉穿，又謂：「全裸一定唔得！」

此外，昨日同場的Mandy Lieu被發現發福不少，不過她卻否認說：「我唔係肥咗，我個個禮拜都有上磅，體重冇升冇跌，但如果女仔經期嚟重咗就難免。」談到男友有否大讚她的一雙修長美腿？她甜笑說：「有呀，佢仲讚我雙腳比例夠長，但我就希望上身比例長啲！」

Ana R.絕不隆胸

前晚Ana R.亦為紙業品牌Fedrigoni擔任模特兒，穿上「中門大開」吊帶裙的她酥胸半露，並謂十分滿意自己的上圍：「我好滿意我嘅小B cup，所以冇諗過隆胸，我覺得自己大胸會好奇怪，又會平衡唔到，最重要係隆胸同埋打botox都係唔環保嘅！」

文︰名人組