絲絲講場：蓋茨煲劇都離唔開硅谷
微軟創始人蓋茨原來鍾意煲美劇，話說美國科技媒體GeekWire報道，蓋茨喺個人網誌中推薦美劇《硅谷》（Silicon Valley），仲話如果想了解硅谷運作，就應該追睇呢部由HBO製作嘅電視劇。
諷刺行業生態超誇張
《硅谷》係講互聯網初創公司Pied Piper點樣同科技巨頭Hooli競爭。呢個故事竟然觸動到蓋茨，佢透露已經睇完前4季嘅內容，家陣正搵時間去睇埋最新嘅第5季。
蓋茨形容，呢套劇係諷刺硅谷嘅行業生態，所以劇情都會誇張啲！好似主角嘅Pied Piper公司講到有超能力咁，竟然可以砌低以谷歌和微軟等科技巨頭作為原型嘅Hooli。但現實上，細公司亦可以好無能，大公司因為有資源做深入研究，並着眼長線，呢啲都係小公司冇辦法做到。
之不過，蓋茨仍然大讚呢套劇集，因為裏面有好多不同個性嘅人物，令佢覺得好熟悉。
余絲韻