絲絲講場：71歲許照中圓大學夢

今年71歲嘅六福金融主席兼行政總裁許照中，當年出道早，冇機會讀大學，最近佢為咗想聞下陣「大學味」，參加咗個短期課程，飛咗去名牌大學英國劍橋大學讀咗四日書，日日朝八晚九上堂，住設備簡單嘅學生宿舍，但佢一啲都唔介意，仲話好值得添！

其實佢今次讀嘅係由香港董事學會同劍橋大學一齊搞嘅全球董事課程，喺英國及香港各上四日堂，學費幾多絲絲就唔知啦，但亮點當然係可以喺劍橋上堂啦！

佢話自己都真係被劍橋大學所吸引，個讀書大計諗咗好耐。成個課程有二十幾人，當中香港佔八人，其餘都係來自不同國家嘅政府或大企業高級行政人員及專業人士等。

好多人問佢，都一把年紀，點解要山長水遠去到英國讀書？佢話自己當年冇讀過大學，畢業後最多都係讀過中大校外課程，好想還下心願。

事實上，劍橋大學冇令佢失望，除咗學到好多嘢，如企業社會責任，尤其係西方近年好重視氣候環境轉變所帶來嘅影響。更重要嘅係，建立關係網絡，令佢認識到唔同層面同圈子嘅人士，好多更加係大企業嘅精英。

許照中仲話，四日之中最特別係有一晚，大學邀請學生們去劍橋大學嘅Queen's College晚飯，呢間學院古色古香，令佢印象難忘。而上完所有堂之後，許照中只係去咗一日倫敦就飛返香港，冇咩點玩過，真係好勤力！

余絲韻