Market Insight：持盈保泰 審慎為上

睇番港股昨日收市後，外圍依然未平靜，事關歐洲市初段美國道期延續跌勢，加上美匯指數升上96水平，美國十年期國債孳息率跌至3.15厘的近期低位，反映市場避險意識上升。其實亞太區股市普遍都跌咗唔少，如日股跌2.6%。如外圍續跌，有機會形成新一輪環球大跌浪，屆時中港股市都無得避。

資金散水無謂博

港股周一彈得係威係勢的板塊，大部分走晒樣，其中以內房股同教育股回吐得最慘烈。查實板塊基本面根本就未曾有改善，試問資金又豈會「長駐」，既然個市「走樣」，梗係走得快好世界！近兩日升市主力的中資金融股，初段仲算叫做硬淨，但最終難敵市場力量，四大內銀全線跌逾2%；至於兩大內險中國人壽（02628）及中國平安（02318）則分別跌2.5%及0.7%。

大市彈散，搵啖粥水食都難！單睇隻騰訊（00700）就知個市有幾閉翳，股價跌4.6%報277.8元，收市價仲低過周一低位280.6元。跟手睇埋周線圖，現價仍在六月至今下降通道內，未來有機會再與恒指互相拖累，愈跌愈深。

昨日藍籌股中，只有申洲國際（02313）逆市上升，其餘全線下跌，除金融股及騰訊帶領跌外，中國移動（00941）昨日都貢獻恒指跌幅56點，股價裂口下跌3.8%報74.5元。中移啱啱公布咗截至今年九月底止首三季業績，純利950億元人仔，按年增長3.1%。昨日多間大行就業績發表報告，大摩雖認為中移季績符合預期，但維持「減持」評級，目標價70元；德銀預期集團明年有驚喜，維持「買入」評級，目標價104元。

大行撐聯通多啲

至於富瑞則指，中移份季績較聯通（00762）差得多，料該股有沽壓，重申「持有」評級，目標價64.85元；野村就維持集團「中性」評級，目標價79元，行業首選為聯通。照咁睇，大行睇法都好個別，目標價亦比較闊，稍為的共通點是認為聯通前景較佳。

咁講真，昨日聯通跌0.9%，確係跑贏中移。不過，事實係中移早前累升唔少，故如今跌得較急都好合理。反而策略部署方面，既然大市又再chok過，短炒買中上升股份兼有胡食，難度極高，就好似昨日如果睇中上述兩股，大跌市下無論買邊隻的結果都一樣，只係輸多輸少問題。既然係咁，投資者家陣最緊要保住本錢，在適當時候選擇持盈保泰絕對係上策！

古勝