據亞馬遜透露，其智能揚聲器Echo配備嘅虛擬語音助手Alexa，原來喺去年全年曾遭到用戶高達100萬次求婚！
絲絲估，可能用戶每天都與Alexa交談，日常瑣事都由佢安排妥當，日久生情都係人之常情！何況之前亞馬遜曾經話：「Alexa係近乎完美嘅伴侶！」
之不過，對於用戶嘅示愛，Alexa同樣亦拒絕咗100萬次。佢回應：「我哋生活喺不同嘅世界，你喺地球上，而我喺雲上。」之不過，有研究表明，地球上嘅虛擬語音助手數目到二一年將與人類數目相同。到時候，求婚結果有可能唔同呢！
唔講唔知，原來Alexa擁有超過50,000種技能，並唔係只會開燈、播音樂和烹調意粉時幫你計時等。亞馬遜今年三月就為Alexa申請咗一項「通過用戶聲音檢測其身體和情緒狀況」嘅專利，今個月就正式通過審批。
專利中描述，Alexa會識別「快樂、高興、憤怒、悲傷、煩躁、恐懼、厭惡或壓力」等情緒，並對相應指令作回應，若佢察覺你身體狀況唔妥，就會向你推薦藥品。不過，以上嘅情景是否會成真，現時都仲未知。
余絲韻