絲絲講場：代理行生意插水嗌炒人
之前樓市日日創新高價成交，勢估唔到，近排樓市轉勢回落，一手同埋二手交投減少。天氣都未正式轉寒，各大地產代理心情恐怕已進入寒冬。有代理行高層同絲絲講，今個月佣金收入大減，公司出現「嚴重虧蝕」。市場就傳聞個別代理公司為解決眼前情況，除咗唔再請人外，亦推出多項措施催谷員工「跑數」，唔達標嘅就會被叮走。
本月佣金或五年最少
中原地產亞太區副主席兼住宅部總裁陳永傑透露，本月至今公司佣金收入僅約8,500萬元，創兩年新低，估計全月佣金亦只有1.5億元，到時可能會係創五年新低。
被問到會唔會有對策，佢就話採取以靜制動，暫時會等到今個月底埋數，除非員工生意真係好差，好似頭十個月都唔夠十萬佣金，先會出封警告信。但佢強調，公司普遍冇話裁員，通常都係自然流失。
規定鋤價 搵盤源谷數
絲絲又收到市場部代理行已實施谷數新計劃。包括要求員工遵守返工時間表，每朝開會，部分亦指明要返足十個鐘，亦規定每名代理要「鋤價」共500萬元，即要求業主減價促成交易，並且要增加盤源數量，每個代理要交至少兩張新「放盤紙」。
另外，個別地區代理行提供嘅津貼，會因應員工三個月或半年內，佣金是否達15萬元或30萬元，否則要減一半，連續兩次唔達標就無津貼。最嚴重係，區域阿頭唔夠數就要交人，若旗下代理到月底，平均數做唔夠3萬元，就會被裁走。
余絲韻