孖妹S檔案：股災月使乜驚 抗跌有計

梁：「散戶股神」 梁宇恆

港股：吉汽港交所價殘可吼

Kitty：恒指今年一月底爆上33,484點歷史高位，之後就輾轉下跌，若果我早啲識得玩沽空，仲唔發達咩？

梁：之前無沽空，依家就算罷啦。我覺得港股差唔多見底，由高位跌至年內26,219點，都已跌咗好多。我估計最多再跌10%，頂多試25,000點。

彩兒：你最近冬眠？

梁：無錯，我依家All Cash，等緊機會撈底。吉利汽車（00175）及香港交易所（00388）都跌得夠殘。至於舜宇光學科技（02382）、騰訊控股（00700）、招商銀行（03968）及中國平安（02318），就等佢哋再跌多少少。我鍾意呢啲大隻得嚟、又有前景嘅股份。

Kitty：騰訊會翻生嗎？好多散戶心已死。

梁：我相信佢會捲土重來。中國政府雖然加強對電子遊戲管制，但騰訊係大型開發商，比其他競爭對手更易應對管制，例如實施實名認證，規限未成年人士每日只能玩唔多於兩小時。況且，微信及QQ平台已建立龐大忠實用戶群，料線上廣告收入會持續增長。

彩兒：你儲咗幾多彈藥？

梁：唔使好多，我會向證券行借孖展，做一倍槓桿。然後用四分之三資金買5至10隻股票，剩餘四分之一就買期指或期權。

睇市盈率定投資時機

Kitty：似乎太搏喎！

梁：我做好準備，入市前諗定風險承受能力。孫子兵法都有講，勝兵先勝而後求戰；敗兵先戰而後求勝。要贏，先要有必勝嘅謀略及準備，至好同人宣戰。另外，從經驗得知，每隻股票一般每年都會勁跌一至兩次。因此，最簡單做法係用市盈率釐定買入賣出水平，如喺港交所市盈率逾28倍時買入，逾40倍時賣出。當然都要細閱財務報表，再作調整。

金：期權及程式交易專家 金曹

「散戶股神」梁宇恆相信，騰訊會捲土重來。

期權及程式交易專家金曹表示，如果恒指見28,000點，投資者可以做淡倉。

期權： 新手入市前要識四招

金：恒指喺28,000點可以做淡倉，或者見期指喺28,400點有大阻力，且料十月份市況波動，投資者可買入「馬鞍式組合」，即買相同合約月份及行使價嘅認購及認沽期權，望食正恒指短期內出現爆邊走勢。

Kitty：有無幾個易學嘅期權買賣信號，等我捕捉入市時機？

金：你可將近期最活躍認購期權行使價加期權金，就得出打和價約數，即上方阻力位。屆時，有下跌壓力，投資者宜先食胡。相反，將近期最活躍認沽期權行使價減期權金，就得出下方支持位，可博反彈。另外，若正股出現量價齊跌，認沽期權成交量增，就唔好博反彈，因其實或跌勢未止。

彩兒：跌市已令我血壓上升，我依家唔想贏錢，只想對沖風險。

Kitty：最簡單就係買入認沽期權長倉，最盡都係輸期權金。

固定波幅策略具優勢

金：學買期指或期權，有幾個步驟要知道！第一，你要睇吓手上嘅貨防守力夠唔夠；第二，選擇方法對沖，如買入認沽期權，若指數上升或唔郁，輸盡都係期權金；第三，計算對沖比率，建議對沖一半，即若股票下跌而導致虧損100萬元，淡倉對沖工具就可以補償50萬元損失；第四，當股票跌到咩水平拆倉。

金：好多專業投資者會用固定波幅策略，即揸正股，同時沽出價外認購期權，買入價外認沽期權。可對沖正股，且小升時仍有賺，大跌市可護盤。

彩兒：需要定止蝕嗎？

金：當然！定止蝕唔止賺，等利潤跑，回落跌穿止蝕價平倉。每日推高止蝕價，例如期指回落100點止蝕，或現貨回落5%止蝕，或買入資產跌穿10日平均線止蝕之類。同樣道理，當沽出期指或買入熊證睇淡後市，只要反彈唔超過預定止蝕位或計數位，可繼續睇淡，但每日要檢討有無需要推低淡倉止蝕價位。

Kitty：你點睇後市？

金：恒指市盈率喺股災期多數會跌到8至10倍，如雷曼爆煲時，市盈率都係跌到逾8倍，因此料目前港股最多跌至22,000點。

諸：華夏基金（香港）ETF業務主管 諸人進

ETF：A股看俏 比港股值博

諸：港股夾喺中美貿易戰之間，且價值又唔夠A股好，所以港股仲有得跌，記住唔好溝貨！恒指26,200點無險可守，若再下跌，支持位係24,000點。

Kitty：袖手旁觀，會心理唔平衡噃。

中國或有力抵禦貿戰

諸：你可以睇跌，買反向產品，如FI華夏恒指（07321），但提一提，港股陰跌難捉路，你要貼市啲。然而，你亦要抽時間審視投資組合。若手上蟹貨本身係優質股，就無必要急沽，睇長線啲都得。科技股都係，雖然目前股價受壓，且被批評估值過高，但受惠國策推動創新科技，料科技股將再炒上，入市都仲得。

彩兒：內地咁多獨角獸誕生，科技板塊或再起風雲。

諸：邊個板塊會率先炒起，真係幾難估，所以我唔建議大家買個股，不如大包圍，買入華夏滬深三百（03188）及華夏A國際通（03197）。坦白講，長線受惠中國經濟高增長，且A股年內已跌逾兩成，所以股價有望緩步上揚，收復失地。例如貴州茅台（600519.SH），市場料其盈利增長強勁。

Kitty：中美貿易戰打得咁激，買A股似自掘墳墓。

諸：中國有足夠能力抵禦貿易戰所帶來嘅經濟損傷。最壞情況係，美國向中國所有入口貨品徵收重稅，但對中國GDP嘅影響都只係少於0.5%，相對於一八年GDP增長目標逾6.5%以上，影響好細。再者，中國仲可以靠基建投資支持GDP，抵銷貿易戰損失綽綽有餘。另只要中國稍為放鬆樓市調控，亦有助提振經濟。

彩兒：A股同港股，一個好一個壞，美股又點？

諸：我唔睇好美股，因強者總會沒落，投資者可以買FI華夏納一百（07331）。

周：瑞銀亞洲股票衍生產品銷售部董事 周國威

華夏諸人進表示，港股受累中美貿易戰，之後仍會下跌。

瑞銀周國威稱，股票牛熊證愈來愈受歡迎。

輪證：淡友刀仔鋸大樹之選

Kitty：無錢又想投資，當然最想以小博大！

周：其實，無論好市定淡市，窩輪牛熊佔大市成交一直維持逾兩成。年內窩輪及牛熊證發行量已經超過一七年全年數目，當中股票牛熊證愈嚟愈受歡迎。

彩兒：目前多數係睇好定睇淡？

周：最近熊證街貨多過牛證，表示散戶都睇得幾淡。若你都想睇跌但又唔想沽出手上持股，可以考慮買熊證或認沽證（Put輪）。窩輪及牛熊證最差情況都係輸晒投資本金。

Kitty：好！我跟大隊！熊證定認沽證，揀邊樣好？

周：Put輪啦。因買較貼價嘅熊證，容易被打靶，若股市先升後跌，買啱大方向都無用；若買較遠價，槓桿低，需要好多資金先足夠對沖正股。相反，買Put輪就無收回風險，就算股市先升後跌，輪價都有機會升番，有仇報。而且受惠埋引伸波幅上升，輪價亦會跟住升。

彩兒：若我堅持後市向好呢？

Kitty：Double-up！你都幾夠膽。

周：正股就當長線投資，Call輪或牛證就當短線操作，都可行。而輪證有槓桿，所以唔似正股般需要咁多資金。無論係Call輪或牛證，都可以用同樣計法計算投入金額。睇產品實際槓桿，假設你想對沖100萬元嘅貨，而實際槓桿係10倍，理論上你可用10萬元買。槓桿愈高，需投資嘅本金就愈少，但風險同時愈大。牛熊證嘅實際槓桿可以非常大，50或100倍都有。

有賺宜食胡 切忌溝貨

彩兒：仲有無咩入市貼士？

周：喺上落市，最好一有賺就食胡，鎖定利潤，然後再用賺到嘅資金入市。再者，唔好溝貨。以Call輪為例，喺某股份見30元時，買入該股Call輪，其行使價為32元，但若股價跌到20元，再溝番同一隻，行使價已離現價幾遠。又以牛熊證為例，若以0.1元買入熊證，但之後正股股價不跌反升，你再溝同一隻，係平咗，但其收回價就近咗，打靶機會亦大咗。因此，若你想加倉進行睇好或睇淡部署，記住揀其他條款嘅產品。

彩兒、Kitty