Market Insight：聯想業務漸入佳境

本周又再踏入傳統的十月股災月，加上中美貿易戰發展未明朗，美國十一月初中期選舉前有乜突發新聞亦係不明朗因素之一，究竟港股會繼續矮仔上樓梯，定係行人止步？相信本周的走勢對後市有一定啟示，大家要金睛火眼睇清楚。

加息影響有待顯現

美國連番加息下，香港終於跟隨加息，對經濟尤其是樓市的影響未有耐反映到出嚟。不過，美國十年期國債孳息率早前已經彈上3厘水平，美匯指數則升至95水平，在新興市場央行想跟加，但又怕當地經濟撐唔住而無能力加息的困難局面下，睇怕市場隨時又再炒作新興市場走資等話題，大家博還博，入市都係要嚴控注碼。

睇番港股上周表現，藍籌個別發展，但股王騰訊（00700）同港交所（00388）都同大市背馳，上周五分別跌0.6%及0.9%不等，所以如果要追勢，都係揀受惠加息的金融板塊，又或者股價表現較突出的個股較值博。

好似聯想集團（00992）就一度被投資者唾棄，但自從被剔除恒指成分股後，股價就脫胎換骨，以四月尾低位3.53元升至上周五5.72元收市計，已累升近逾六成，大幅跑贏同期港股。

從基本因素看，集團早前公布截至六月底止首財季業績扭虧為盈，轉賺7,704萬美元，加上集團期內個人電腦（PC）業務已重返全球市佔率第一位，業務表現似係重拾佳態。

雖然集團股價累升唔少，但無論從近期股價愈升愈有，以至各大行先後上調集團投資評級及目標價反映，市場睇法正面之餘，資金追貨意欲亦大，只要股價守穩中期升軌支持約5.2元，似乎仲可以候低買，但6元水平阻力較大，早前已上車者見好位可考慮分注食胡，候低再吸納更划算。

博反彈避開弱勢股

此外，以前一直都講，如果大市上升或反彈時，板塊仍逆市下跌就一定要小心，皆因相關股份彈力全無加上現時通街平貨，試問資金又點會貿貿然衝入去追落後呢？好似醫藥、教育同內房股近期都係絕佳例子，醫藥股中不妨以金斯瑞生物科技（01548）作為例子。

早前醫藥股被洗後，表現一蹶不振，金斯瑞股價亦從五月在30元樓上，反覆跌至八月低見11.9元，所以儘管集團就閻火研究發報告作反擊，但其實在行業氣氛偏淡下，博反彈的值博率亦唔高。加上集團即使已作澄清，令股價上周五復牌後回升逾一成，但要投資者重拾對集團的信心需時，所以最好都係眼看手勿動。

古勝