絲絲講場：滴滴幾千萬請搭車求客抽秤
內地打車App一哥滴滴出行創始人兼CEO程維分享成功心得，話滴滴嘅成功取決於用戶價值，令公司唔使靠燒錢搶客，反而每年會使幾千萬人仔，邀請神秘客戶Call車，檢測服務夠唔夠好。
創新模式先係出路
程維解釋，做生意鬥燒錢係行唔通。佢以共享單車品牌小藍單車為例，話小藍單車從創業第一日起就公認係最好踩嘅單車，但都係執笠收場，原因就係有人免費提供服務。而共享專車嘅道理其實一樣，如果你補貼十蚊，哪怕你嘅服務比人哋差啲啲，呢十蚊嘅價值都好大。所以，你應該要畀客戶知，服務背後係一種創新嘅商業模式，咁先係真正嘅生存之道。
內地打車App眾多，但滴滴無懼對手燒錢爭客，程維指，滴滴嘅用戶係分層，好似有順風車、快車同專車，針對唔同需要。好似順風車，滴滴可讓用戶享受便宜40%嘅車費，但滴滴向司機抽佣就可以高達5%，呢啲就係平衡商業價值同用戶價值。車費平咗，乘客多咗，抽佣相對又多，大家都會接受。一句講晒，和氣生財！
余絲韻