絲絲講場：UNIQLO老闆新作值千三億？
UNIQLO創辦人柳井正舊年出版嘅《經營者養成筆記》被指係一本價值1.8萬億日圓（約1,375億港元）嘅傑作！舊年呢本著作喺日本一推出就賣出10萬本以上，近日柳井正呢本新書再度成為管理界嘅熱門評論焦點。
教點做成功嘅老細
何解？事關UNIQLO母公司迅銷集團（06288）去年營收高達1.86萬億日圓，股東多賺近1.5倍至1,192億日圓（約88億港元）。難怪一時間成為企業老闆們爭相追看嘅成功秘笈!
柳井正以前出版嘅力作《一勝九敗》已經為人津津樂道，今次嘅新作《經營者養成筆記》，佢就傳授點樣做一個成功老闆嘅心得，包括唔好怕冒險，風險高利潤才高，只要識得評估風險就得了。
基本而言，柳井正認為一個成功嘅老闆要做到以下四點，首先，一切以顧客為中心，企業要賺錢，就必須將呢種工作態度貫徹到各個部門同崗位。第二，集中力量生產最高標準嘅產品，最理想嘅生意係僅憑藉某種商品就獲得極高嘅銷售業績。而最典型成功案例之一就係蘋果公司（Apple Inc.），一直只賣iPhone、iPad和Mac機等幾樣產品就賺到笑。
付諸實行先係竅門
第三，就係速度、速度同速度！速度有兩層含義，一層意思係搶佔先機，另一層意思係快速完成工作。最後係一定要落場。如果你想成為優秀嘅老闆，但又唔知道點樣去經營，咁你就應該落場去睇睇。只要你落場，顧客自然就會講個問題你知。
總結以上經營理念，柳井正明白其他老闆似乎一樣可以諗到，但就做唔到。所以，機會只係屬於願意付諸實行嘅老闆！
余絲韻