Market Insight：短期部署 淡友秤先

昨日恒指跌135點收報31,414點，點數睇落跌幅唔大，但若以即市高位31,978點計，大個足足掟咗564點落嚟，32,000點關口唔穿兼整支大陰燭，走勢肉酸到暈。期指大戶都真係搵啱時機，趁股王騰訊（00700）業績及聯儲局公布議息結果前，市場不安情緒高漲一刻突襲，果然即見奇功，將個市成功舞高弄低。

港恐要追隨美國加息

古勝執筆時未有議息結果，惟利率期貨所見，聯儲局新主席鮑威爾至少加0.25厘幾無懸念。睇住港匯沒有明顯資金流出，單係套息就推到落到7.8466，差三十幾點子觸及弱方呈換保證水平。

中短線睇，港美息差緩衝區已經用盡，斷估無條件再唔跟加，心理及實際上，短期牌面確實係淡友比較秤先。睇走勢，後市落番31,000點樓下再吽過，機會應高於攻上32,000點樓上。

收市後騰訊業績對辦，去年賺715.1億元人仔，增長74%，同大行估630億至680億元人仔比較，可謂超額完成有凸。期內，每股盈利7.598元人仔，派末期息0.88元。值得留意的是，昨日傍晚騰訊成績表見光後，恒指夜期仲未止瀉，繼續玩大低水。

股王力挽狂瀾唔容易

再睇埋中國平安保險（02318）靚靚業績後股價見光死，昨日穿頭破腳由高位掟6.9%殺到落day low收報88.3元。儘管大行今日必然齊齊調高股王一八年及一九年業績預測，但足唔足以令49倍PE的騰訊股價力挽狂瀾再破頂，睇嚟都只係五五波。

新股市場無懼市況波動，有剛截飛新股，缸邊傳出超額認購可能達幾千倍，相信會遠遠超前二○一四年，港股史上超購王、夜場股Magnum的3,558倍紀錄。諷刺的是，當年新股客前仆後繼的Magnum，上市年多已經易手兼改名，現在叫奧克斯國際（02080）。

誇張的超額倍數，一來發行股數十分有限，更重要係早排賓仕國際（01705）掛牌兩日狂升6.9倍，吸引咗一班新股客入番場，唔明到底幾千倍有乜概念？當然，一部分新股分配要照顧小投資者，一兩手小額認購，認購比率點都會比大飛甚至頭槌飛機會高。

不過，假設真係以平均分配，幾千個申請只得1個「中獎」，即使計埋回撥，都係講緊約千分之一機會，計落同六合彩中五獎的1,082分之1機會率差唔多。畀個市嚇親無入飛唔緊要，買張六合彩都差唔多，至少唔中，都順便惠澤社群！

古勝