絲絲講場：大牛市輸錢 原因你要知
舊年港股飆36%，但竟然有91%散戶嘅投資回報跑輸大市，仲有17%人直頭蝕錢！連升市都冇錢贏，股市真係咁難玩？問題原來出喺呢度……
話說香港證券業協會今年初進行會員調查，結果顯示，得9%人舊年整體投資回報有31%以上，即是跟得貼甚至跑贏恒指舊年嘅36%升幅，換言之其餘91%人跑輸大市！
散戶唔熟新經濟股
點解大市升反而蝕錢？協會副主席徐聯安講笑話「可能係買咗謎網股」，不過佢講真嘅係，舊年恒指升幅中，有63%係來自五隻大型股份，但有啲散戶對新經濟概念行業唔了解，所以未能受惠升市。升幅最勁係邊五隻股？睇隔籬個表。
仲有就係，協會主席張為國估計，由於投資者多數「炒出炒入」，所以唔能夠完全捕捉升市。
唔只咁，徐聯安仲話，散戶多數鍾意買細價股，對過400蚊呢類大價股好似騰訊（00700）等會覺得「貴」，就算升幾十蚊，睇落感覺升幅細，見大價股愈升愈唔敢買，所以就算恒指升咗咁多都冇咩點賺。
有冇點中閣下死穴？但過咗去就算，今年點睇？調查顯示，有42%人認為香港係最值得投資嘅市場，41%人認為美國市場就最高風險，58%人認為股票係今年最值得投資嘅資產類別。
今年睇好金融板塊
41%人認為股市出現資本外流會令今年港股面臨挑戰與風險，46%人認為今年恒指升或跌幅空間5至20%，37%人認為美國聯儲局政策會令港股大幅上落。
至於買乜好？接近三分之一人認為今年銀行金融股會跑贏大市。
余絲韻