絲絲講場：亞馬遜成美企頭號噩夢

報道強調，亞馬遜無邊際嘅野心，今時今日已經成為美國各行各業嘅噩夢。每當傳出亞馬遜進軍或有意進軍某個行業嘅消息，相關公司嘅股價都會應聲下跌。美企老闆日日都好擔心，下一個遭殃嘅會係邊個？

市值近6萬億 全球No.3

報道又將亞馬遜評為最估佢唔到，以及擴張最不講道理嘅公司，而佢仲係所有競爭對手嘅眼中，世上最可怕嘅公司添！

事實上，亞馬遜依家已經係全球市值第三高嘅公司，達到7,660億美元（約5.97萬億港元），其CEO貝索斯已經成為世界首富，身家達1,120億美元，超過微軟蓋茨嘅900億美元。目前，只有蘋果公司和Alphabet在市值上高於亞馬遜。

野心奇大 橫掃各行業

究竟亞馬遜嘅野心有幾大？佢似乎想喺每一個行業都佔一席位。由包裹運送、超市和包裝食品、服裝、貨車運輸、汽車零部件、製藥、房地產經紀、化妝品、演唱會票務、游泳池用品及銀行等行業嘅公司，喺過去一年都曾因為亞馬遜嘅進軍或者有意進軍嘅傳言，而喺資本市場受創。

最後，「To be Amazoned」已經成為美國企業嘅口頭禪，意思係你嘅公司因為亞馬遜進軍你所在嘅行業而被摧毀，呢種對亞馬遜嘅恐懼已成為商界嘅一個重要特徵。

咁新一輪邊個又會被Amazoned？分析人士就估，亞馬遜可能會直接挑戰聯邦快遞和聯合包裹兩大公司，而呢兩家公司總銷售額約1,260億美元。

余絲韻