絲絲講場：盧韋柏離花旗 唔撈金融界
被稱為銀行界「神奇小子」嘅花旗集團香港及澳門區行長盧韋柏，原來已經遞咗辭職信，五月正式生效。花旗集團話，目前正喺內部及外邊搵繼任人選，若果有合適人選會對外公布。
捱13年做到港澳掌舵人
盧韋柏喺○○年加入花旗，由中層管理開始做起，用咗十三年時間攀上花旗香港及澳門區掌舵人一職。佢其實係一位土生土長嘅香港銀行家，細個喺華富邨成長，中學時期入讀英皇書院，仲曾經係手球香港代表隊成員，絕對稱得上文武雙全。大學畢業之後，第一份工係寶潔公司（P&G）負責品牌推廣，後來轉去可口可樂公司擔任亞太區品牌總監。
其實盧韋柏喺花旗做咗五年行長，就話要辭職唔撈，真係跌晒眼鏡。至於辭職之後條路點行，佢就話未必再喺金融界發展，反而想試吓喺大中華地區搵其他出路。
余絲韻