絲絲講場：財金名人辦公枱點布陣？

打工仔每天對得最多嘅，除咗同事之外，就係自己嘅辦公枱。枱上每樣擺設，都可以反映打工仔本身嘅個性，更能透露出成功玄機！絲絲就帶你睇勻全球6位成功財金巨人嘅辦公枱，睇吓可唔可以搵到成功啟示！

Facebook嘅辦公室成日畀人讚係「全球最型Office」，開放式嘅工作空間，設計似足遊樂場，員工可以寓娛樂於工作。朱克伯格曾經直播介紹Fb新總部，佢枱上有一大堆書、一部MacBook、無線喇叭、有Fb標誌嘅擺設，以及Fb互聯網通訊衞星AMOS-6模型。

蓋茨辦公枱非常簡樸，冇文件，亦都冇書，佢對住嘅係得3個並排而放的電腦屏幕。佢曾經話過，咁樣做可以幫到佢喺各個屏幕中處理不同項目，從而可以提高生產力。

提起布蘭森，佢外形同舉動畀人一種叛逆、不羈嘅感覺。至於佢張枱係點？佢話明唔鍾意喺固定地點工作，反而喜歡喺非正式場合，例如佢嘅私人島嶼上同員工或工作夥伴溝通，更寧願喺梳化、吊床，甚至浴缸中工作。另外，佢都好支持員工有靈活嘅工作空間。

馬斯克就話自己根本冇固定辦公枱：「我嘅工作地方不斷轉變，總之Tesla邊度出現最大問題，我就喺嗰度辦公。」

去年底就曾經有報道指，「工作狂」馬斯克當時嘅辦公室係美國內達華州斯帕克斯嘅超級工廠，有一次電話會議入面，馬斯克仲話自己身患感冒，所以一直喺工廠入面「寄宿」。

桑德伯格習慣喺辦公枱旁邊多擺放一張可移動嘅枱仔，用嚟擺潤唇膏、小啞鈴、健怡可樂及用於治療手腕疼痛的按摩膠棒等。

巴菲特多年前曾經帶媒體參觀佢辦公室，當時見到有唔少舊相。但辦公枱上竟然冇電腦，但就放咗一架曾經屬於佢父親嘅模型火車。佢仲公開講過：「我有呢個Daddy，係人生中最好嘅禮物。」

余絲韻