Market Insight：黃金相關股睇勢短炒

資金避險需求上升，國際金價做好，黃金ETF及金礦股逆市靠穩，招金礦業（01818）及紫金礦業（02899）升幅介乎2至3%，SPDR金ETF（02840）則升2%。

若然看好金價短線走勢，又必要買黃金相關個股，在下還是屬意股價表現對金價走勢敏感度較高的招金，且看是浪能否反覆向上挑戰250日線7.08元。但當然，若要緊跟金價走勢，最直接的方法還是買黃金ETF，除了SPDR金ETF，價值黃金（03081）及恒生人幣金ETF（83168）亦可關注。

預留實力執平貨

北韓惹是生非，正在挑戰大國的容忍度，玩火自焚。古勝相信，若然美國真係郁手，相信短時間內有結果。全球金融市場震盪係在所難免，但只會維持一段好短時間，好快又會重納正軌。所以萬一真係朝鮮半島見火光，可能係博第三、四季升浪的最後入市點，反正呢一刻唔好太重貨，預留實力，等有大跌市出現才有子彈執平貨。

A股維穩 ETF分注買

真係有政治事件觸發股市大幅波動，想趁「火」買貨，照計唔少得中資金融股份兒，皆因中國市場偏穩，而板塊估值始終相對落後，加上有一定息率，中短線攻守兼備。今日建設銀行（00939）及工商銀行（01398）將公布業績，且看會否有驚喜。

內銀基本因素好轉

不過，圍繞內銀股其中一個最大的風險，乃房地產泡沫。然而，觀乎內房股已公布的數據，情況又似乎受控。亦即是說，內銀股的基本因素有所改善，而流出科網股的資金，部分會流入估值相對低的中資金融股，亦係合理的推想，但當然，站在流通量及息率角度，唔大唔買係大原則。

不過，宜留意今年十一月內地將舉行十九大政府換屆，此前官方將全方位維穩，重點對象包括金融市場，由此推測此前兩地股市都不會出亂子。事實上，近日滬綜指突破3,300點後未肯回頭，昨收報3,365點，升2.57點，下一個重要阻力區在3,500至3,600點水平，且看能否在十一月前一試該水平。

若看好A股可穩步向好可從A股ETF入手，如安碩A50（02823）及南方A50（02822），只係考慮到地緣政治風險上升，分注入場方為上策。

科網股調整未完

股王騰訊控股（00700）繼續調整，昨日失守20日線，低見314.6元，收報319.8元，跌0.99%。其實，不獨是騰訊捱沽，其他科網股如金山軟件（03888），股價已連現四大支陰燭，失守250日線亦未見反彈，反映資金求去心切。正所謂「莫買當頭跌」，除非對個股基本因素信心十足，否則仲係等股價喘定，先至好諗係唔係撈貨。

瑞聲波幅真係唔簡單

聽聞蘋果公司於下月中旬推出iPhone 8，此前同屬科網股的瑞聲科技（02018）股價仍可反覆向好，昨日股價竟然落過130元左右又再反彈上全日高位144.4元，收報141.2元，升3.07%，波幅之大，再一次說明呢隻股真係大鬥大的玩意。

再睇瑞聲沽空股數達185萬股，沽空比率上升至15%，古勝都係維持原來睇法，即行埋一邊等睇戲，少沾手為妙。

古勝