絲絲講場：GoGoVan老總唔恨上車 望上主板
香港80後、90後個個都夢想買樓？未必。剛30出頭嘅GoGoVan聯合創辦人兼行政總裁林凱源（Steven）就話，寧願留番啲樓畀其他人買算啦。
絕對唔係因為錢嘅問題，Steven可謂光宗耀祖嘅香港仔，佢用咗幾年嘅時間，同朋友攞出幾千蚊創業資本，成功搞咗間初創企業，仲愈搞愈大。如今佢一擲千金買樓，一定無問題啦！
四圍飛 唔急買樓
Steven就話，因為工作關係，要經常到東南亞各地開會，連佢媽媽都呻話喺屋企見公仔多過見阿仔。既然都要周圍飛，仲何必急買樓！佢又覺得現時社會風氣不停鼓吹年輕人買樓完全唔健康。
不過講開樓，Steven話當年冇錢創業要問人借，好彩得初創基金幫忙，否則就要借朋友用來買樓嘅錢，若創業失敗會輸咗朋友層樓。
講到佢間公司GoGoVan，周二正式宣布與58到家旗下嘅58速運業務合併。
望合併兩年後有賺
GoGoVan去年開始向旗下司機抽佣，雖然至今仍未錄得盈利，但Steven預料合併後能擴闊客源，可望兩年後轉虧為盈，仲有意喺香港主板上市。
佢仲話，創業板已經「做爛市」，好多時投資者根本唔知啲公司嘅業務係乜就入市，但佢有信心能夠喺上市嘅時侯，每一個人都識得GoGoVan呢個品牌。果然係Think Big人辦！
余絲韻