Market Insight：內銀業績主導後向

騰訊守穩20日線成關鍵

照計恒指喺28,000點呢啲大位有爭持好正常，若然企得穩其上，則後市要破頂，難度並非想像般高，至於關鍵因素之一，就係睇周內公布業績的內銀股生唔生性了！

港股先升後回，其中一個原因係股王騰訊（00700）唔生性，一度跌至321.4元，收報323元，跌1.64%。睇圖表，騰訊自七月中旬以來都未曾失守過20日線，現時20日線處321元水平，昨日初步下試了該支持位，短線如能守穩其上，整固後仍有望再衝頂，但若然失守，則近月的強勢開始轉弱，下一個關鍵支持位在50日線至300元邊。

古勝建議散戶們暫時還是忍一忍手，別沾手相關輪證，等方向清晰了再動手還未遲，免得做錯邊冇仇報。

空軍集結部署大動作

昨日表現最突出的藍籌係瑞聲科技（02018），全日最高見過139.8元，收報137元，升11%，成交達21.3億元，升幅咁大，好似藍籌當股仔炒！

事緣班空軍冇動靜，大行藉瑞聲的中績理想又嚟合奏，野村、瑞銀及花旗睇145元、瑞信睇143.2元、德銀睇135元、大摩睇150元。不過，今次投行們唔係單邊睇好，里昂、美林都睇得較淡，而高盛雖然將瑞聲目標價由86元上調至93元，但維持給予「中性」評級。

正所謂見過鬼怕黑，唔少人都被瑞聲早前發生的空襲事件嚇怕，故有理由相信參與短炒的散戶唔多，都係大鬥大的玩意。瑞聲股價大漲，見沽空量按日增逾倍至175萬股，沽空比率11%。喺九月新iPhone開售前，唔排除相關股包括瑞聲會繼續炒作，但就要慎防接火棒，且須重點關注其沽空活動，看空軍是否又會趁勢再度出擊。

恒大積極降負債

講番業績股，中國恒大（03333）上半年核心業務利潤同比增長2.49倍，公司話擬於二○年六月前將淨負債降至70%左右，而一七年七月至二○年六月的土地儲備總量將控制在每年負增長5至10%，發展戰略由「規模型」轉向「規模 + 效益型」，並由「三高一低」轉向至低負債、低槓桿及高周轉的「三低一高」發展模式，基本上說法都是理性的，但落實進度及成效如何就要拭目以待。

當然，喺實現到新發展模式前，恒大仍然是一家高負債的房企，上半年借款利息開支高達253億元人仔，雖然截至六月底止手頭現金餘額2,699億元人仔，但其中1,055億元人仔為受限制現金。

昨日恒大平了七月底高位24.1元，觀10日線已重上20日線現黃金交叉，藉業績消息炒一轉唔奇，但呢啲價睇估值就未必買得落手，都係剝吓花生算了。

古勝