尋日（28日）係七夕，喺呢個中國情人節，閣下身邊連牛郎織女嘅影都見唔到個，今年又係獨自一人過？咁恭喜晒，事關調查顯示，「唔脫獨」更易發達！呢啲時節若有人不知好歹向你放閃，係時候將以下呢篇Send過去「回禮」！
外國調查發現，28至30歲嘅年輕「單身女」，較「已婚女」每年搵多1,349美元（即約1萬港元）；如果係44至46歲嘅「單身中女」，亦較同齡「已婚女」每年搵多1,465美元。換言之，每年夠買一至兩部新iPhone裝身。
亦有調查顯示，28至30歲嘅年輕「單身男」，較「已婚男」每年工時少441個小時，即每月少做36.75粒鐘；至於44至46歲嘅「單身中男」，亦較同齡「已婚男」每年工作少403個小時。工作時間少啲，就有更多自己時間諗啲更重要嘅嘢，例如創業發達大計。
單身最重要係有「自由」，有更多時間做自己應做嘅事，尤其係可以放膽創業，增加成功及發達機會。已婚及有兒女嘅，往往趨向穩陣，難免處事保守，係創業發圍大忌！
已婚人好難隨便「享受」。有研究發現，單身人士平均每日有5.56個小時可享受生活，但已婚人士僅得4.87個小時。脫咗獨，就難免要睇睇另一半「面色」做人。
婚姻關係好固然理想，但如果婚姻出現問題，涉及嘅分產等法律問題可以煩到閣下想像唔到，尤其係愛你變成恨你時，真係咩都有可能！
又有調查發現，年齡介乎18至64歲嘅「未婚男女」每周做運動嘅時間，多於已婚或離婚人士；另有研究發現，單身人士少25%機會過肥。除咗以為「上咗岸」就唔理身世外，可能係另一半嘅「陰謀」……
有研究發現，單身人士平均每日至少花12分鐘打電話、WhatsApp、電郵等聯絡舊朋友；已婚者只用得7.8分鐘。咁你話邊個社交圈子大啲嘞？而社交圈子愈廣，愈有助事業發展，發達機會愈大。
余絲韻