孖妹S檔案：散戶變心 輪證衰咩？
「最動人時光，未必地老天荒，難忘的因你太念念才難忘……」花無百日紅，愛情無保證，金融市場嘅金融產品同樣無保障，一旦投資者移情別戀，產品就會被打入冷宮，孖妹留意到香港交易所（00388）份成績表入面，香港第一季嘅輪證成交同比足足少咗成26%，唔通輪證愈嚟愈唔得股友歡心？唔通有更正斗嘅好路數？係時候開File調查吓。
炒家嫌遲開價唔貼市
仁：散戶 阿仁
彩兒：你間中都鍾意捕住啲細價股搵飯食，好似唔高風險你都唔玩咁，點解就總係避開輪證呢？
仁：我好少玩窩輪、牛熊證喇，因個人覺得成套制度唔太公正，由發行機構做莊，如果我要買升跌嘅話，不如直接買期指、期權啦，都有相若效果，起碼係同市場上其他投資者交易，唔會畀輪商食差價，佢哋有時打高幾格、有時又唔盡快主動報價，產品同價值不符。
玩期權賺幅料更多
仁：身邊都有部分股友係會玩輪證，最近兩星期有人玩騰訊控股（00700）Call輪，係賺得幾和味嘅，注碼唔多，一萬蚊左右，賺幅有兩成幾，不過轉個角度諗，可能用Option（期權）做仲和味啊！
其實玩輪嘅朋友主要係有閒錢，聽到貼士買入博一博，貪買賣夠簡單，純粹好似買股票咁，入個冧巴就可以買入，見到價啱，撳個冧巴就可以放，都唔去理相對正股升幅，衍生品升幅合唔合理。
Kitty：寶寶心裏苦，但寶寶不說……衍生產品吸睛度跌咗，第日都唔知會唔會愈出愈少選擇！
仁：我都有股友每次買輪證都放過十萬元資金落去，有時都會見佢哋蝕鑊甘，特別係波動較勁嘅單邊市，呢類股友係比較資深嘅，間中會鬧發行商報價遲、正股股價郁咗但衍生產品價就唔跟、甚至好遲開價，當中較躁底者，會直接打電話去發行商度鬧人，叫佢開價添。
今年輪證成交跌得多，可能係因為今年市況較Chok，好多正股都有波幅喺度，玩輪證嘅，多數都係嫌正股波幅細，所以用衍生產品去放大槓桿，希望賺多啲。今年科網股熱爆，輪商係出咗IGG（00799）輪，但都冇乜人吼啦。
估中Timing先值博 難玩
梁：專業投資者 梁帥聰
Kitty：你咁貼市，又擅長超短炒喎，輪證應該好幫到你手啦。
梁：我覺得啲莊家係睇住牛熊證重貨區嚟挾或沽，雖然係可以玩，但要玩得好小心，如果係玩個股、指數期權，就無咁受莊家或者大戶影響；窩輪呢，我覺得喺牛熊證面世後就唔Hit啦，成交唔多唔少係靠券商去維持咁。
寧炒細價及轉板股
梁：個人少玩輪證，係因為呢樣工具係只啱用嚟捕捉突發性升勢，產品入面有時間值、溢價，惟有估中佢突然飆升嘅Timing先值得買，另外，有時即使股價升，Call輪都唔一定升，一旦升幅追唔上時間值損耗就冇計。
彩兒：縱橫股海，好難連一絲賭仔心態都冇噃，想賭吓嗰陣，你會玩啲乜？
梁：我平時都會搵一啲股權集中嘅細價股博一博，不過呢類股好易中伏，佔我整體投資組合唔會超過兩成，近期我玩緊隻大地教育（08417），佢股權相對較集中，夠亁身，雖然近幾個月股價飆咗上去，但係我覺得未停手，所以最近就買入炒吓，用幾萬蚊喺1.4元撲入去，博佢再創新高！
另外，我仲玩緊隻正利控股（08318），佢計劃申請轉主板，雖然暫時股價走勢冇乜特別，但主板殼價郁啲都6億至7億元啦，轉板價值會有所提升，所以0.48元買入咗少少，博佢再有新嘅轉板消息就趁機出貨。
收集內地百貨教育
Kitty：呢啲高風險嘢就唔啱我喇，可能彩兒好Like，我比較有興趣知道你組合另外八成係乜穩陣股！
梁：事實上，年初至今我整體投資組合一般，回報只有三成，冇買騰訊已經走寶，細價股部分就賺約四成，現時我正喺度收集緊內地百貨股、內地教育股、彈珠機股同埋香港電訊股。
瑞資中資輪商參戰
于：瑞銀亞洲股票衍生產品銷售部董事總經理 于正人
彩兒：雖然呢一刻你遠在新加坡，我都要搵你一探虛實喇，輪枱係咪好難撈啫，你唔怕講喎，最多平時我唔再逼你請食飯啦！
于：唔係喎，你咪單睇成交先得，成交只係其中一個因素啫。今年無論我哋，以及市佔率較高嘅行家都做得唔錯。其實由○五年至今，有超過30間機構涉足輪證市場，但依家就死淨11間，現時都聽聞有公司想加入戰團，包括一間瑞資同一間中資行添，預計今年會登場。想保持龍頭地位，最緊要係做好品牌建立、開價要開得好，市場推廣都要做足，每個月起碼都要搞一次講座啦！
入場費平 仍具優勢
Kitty：股場邊有長勝將軍，或者依家要趁好天收埋落雨柴？
于：今年二月起，散戶睇市睇得好牛，但升到依家呢啲位就開始睇法有分野，由坐貨角度睇，呢幾個月係好景嘅，輪商賣輪賣多咗，今個月係做得最好，因為多人喺輪證市場贏錢，除非係之前喺騰訊績前做淡，又或者做淡恒指嘅人啦。
于：由街貨角度睇，近幾個月間間發行商基本上都有增加，就算傳統智慧係「五窮六絕」都好，依家更多講法係「五不窮、六不絕」，希望呢個市況可以延至下半年啦。事實上，美股自二○○八年金融海嘯至今，都未出現過大調整，美股十大市值嘅公司唔少都係科技、科網股，業績又OK，似呢一浪係未玩完；港股呢邊，推升動力就靠騰訊、中國平安（02318）等股份，但中國移動（00941）、港交所呢啲就仲未郁喇……
彩兒：玩科網股都夠晒激，仲使輪證嚟為炒股嘅生活添上色彩咩？
于：說話就唔係咁講喇，騰訊勁，加上市場氣氛夠旺帶動，但因正股入場費貴，散戶又唔識得借貨沽空，所以即使係啲輪嘅有效槓桿低都會照買。
Kitty、彩兒
若有料報畀彩兒同Kitty或有嘢問，可電郵money.biz@on.cc