Market Insight：航空股有條件炒上

上周油組及非油組國家達成共識，一如預期延長減產協議九個月。油價第一個反應，係由52美元隊番落49美元。自從去年底油組成員齊齊宣布減產托價開始，油價最叻都係衝到上55美元水平，同一四年高峰期107美元一桶相比，打咗個五折。

查實油市不利因素實在多到數唔晒，銀紙唔會講大話，今年三月開始，油價想托都托唔起，半年來幾個浪頂呈現級級落，由55美元到53美元，再到52美元。「侵侵」簽行政指令放寬美國離岸能源開發，頁岩氣商開採的積極性，因油價反彈再度蠢蠢欲動。近日中國表示探明巨量的可燃冰，並揚言有機會達致商業開採。

短中長期消息，對油市都淡淡哋，亦令上周油組托價威力猶如泥牛入海。如果53至55美元成為後市阻力，部分得益於低油價的公司，尤其航空企業可以優先考慮。南方航空（01055）及中國國航（00753）上周雙雙破頂，剩低東航（00670）斯人獨憔悴，同三月高位4.99元仲有近一成差距，睇大家鍾意板塊內強勢股抑或吼冷門。

內險股隨時急起直追

個市企住一五年七月以來高位，今日為五月期指結算同時美股亦休市，加埋明日港股端午節假期，個市今日好大機會牛牛皮皮悶到散場。

A股谷底反彈

不過，近排A股走勢明顯醒神番，炒六月入摩，A股ETF孖寶──南方A50（02822）及安碩A50（02823），連同古勝上周五提及的券商股以及內險股，客觀條件都在改善之中。

去年中保監出手，制止住險資亂嚟，要「保險姓保」，首季開始大型保險公司的市佔率及保費毛利率都開始逐步改善，加上人民幣國債長短期息差開始拉番闊，如果加埋A股走勢谷底反彈，真係集有利因素於一身。

中國人壽（02628）及中國平保（02318）近日升得不慍不火，作勢破三頂的新華保險（01336）及大落後的中國太保（02601）都可以睇實，內險股隨時會步內房股後塵，開行turbo都未定。

香港樓價難言見頂

政府針對熱火朝天的樓市出招，喺短短時間內收緊發展商物業項目融資比重上限，跟手金管局又出手逆周期措施，增加八大銀行新造按揭資金成本，收緊投資者按揭成數及非本地借款人士按揭要求。

點知一樣攔唔住心口掛個勇字的買家，樓價指數連續十四周破頂，上周一個荃灣新樓盤開售，社交網絡媒體畀萬人空巷的震撼畫面所洗版。

美國加息影響有限

金管局出招的連鎖反應，唔使等六月美國加息，本地銀行紛紛調高H按息率，繼渣打（02888）之後，輪到中銀香港（02388）、滙豐控股（00005）及恒生銀行（00011）跟隨加息，由暫時H按加息幅度只係十數點子看，短期似乎心理影響大於實際。

六月聯儲局加息幾成定局，反而之後點開始玩「縮表」，對環球樓市泡沫的影響更為深遠。不過，大家又唔使驚到即刻沽樓瞓街，近日美元與美國長債息都縮番轉頭，債商及大孖沙似乎睇死聯儲局得個講字，怯於華爾街反應，最終都係講多過做。

古勝