北水頭等倉：光國估值不算昂貴

講到互聯互通標的股，上周五輝山乳業（06863）現洗倉式下滑，股價由2.8元急跌至最低僅0.25元，見到有北水入場在低位抄底，下午停牌前報0.42元，單日急挫85%，成交達7.79億股。

每逢出現呢啲股價極端波動，市場都會突然出現好多傳聞猜測，但無論如何，如果公司弄清實情交代清楚，就應該盡快復牌以釋疑慮。

三月港股表現不俗，中資板塊輪流炒。展望四月，由於有長假期，唔排除四月初再上一浸，中旬會轉淡靜。但整體而言，呢轉重磅股業績唔差，而且唔少派息都有改善，有助提升港股估值。

中資水務股中，北控水務（00371）分屬北控集團旗下，論股東背景應該最硬淨；其次係光大國際（00257），母公司光大集團亦為央企，中國水務（00855）則屬民企類別。

派息政策未有大變

若喺升浪初期，揀大唔揀細，到大價股升得咁上吓，先至將部分利潤轉炒風險較高的二、三線股，係比較正路做法。

今日就講吓已公布去年度業績的光國，去年度純利27.84億元，增長34%，但全年派息比率由前年度的39.8%降至33%，其實以金額計實際每股派息有所增長，一貫沿用的派息政策未變，而負債上升8個百分點至60%，但公司處於擴張期，暫時而言負債水平在可控範圍內，需要時公司可考慮推進綠色環保分拆上市，故財務狀況毋須過於擔憂。

光國由去年底的低位8.17元，反覆升至上周高位11.14元，以一家處高增長期公司而言，現價市盈率16.9倍，息率約1.9厘，估值不算太昂貴，回吐守穩10元樓上有得諗。

司慕渢