Market Insight：中石化整固後可再上

投行花旗發表的研究報告都叫人沽地產股，但同時調高恒指目標價，由24,000調高至25,500點，主要係深港通開通後南下資金流顯著增加，令港股市場流動明顯改善。如是者，恒指要繼續向上炒高逾千點的話，應該買咩？小弟認為，可以睇實中資股如內銀、內險、騰訊控股（00700）及「三桶油」。

三桶油之一的中石化（00386）最近就派咗成績表，舊年賺466億元人仔，增長43%，派末期息每股0.17元人仔，增加1.8倍，派息高於預期，再加上同一時間集團就今年首季發盈喜，預計按中國會計準則計首季純利將增長約1.5倍，主要受惠於國際油價回升、上游板塊虧損收窄，以及中下游產品需求穩定，盈利能力增加所致。

昨日中石化股價上過6.35元，乃52周新高，短線整固過後若能以大成交突破6.4元，目標反覆向上試叩6.8至7元阻力區。

佳兆業股東終守得雲開

上周五股價大跌並中途停牌的輝山乳業（06863）尚未復牌，但原來互聯互通喺呢隻股的持倉有成九億幾股，上周五一跌呢批持倉市值足足蒸發逾廿億銀，都咪話唔甘！小股東要密切關注事態發展，有心理準備可能冇咁快可以復到牌。

跟炒只宜小注

遇着手持股票出問題要停賽感覺當然唔好受，好似隻佳兆業（01638），一停就接近兩年，小股東望穿秋水等復牌，最近公司終於完成債務重組，昨日復牌一開市已重上配股價2.3元之上，高位去過2.92元，收報2.43元，升幅55.7%，成交達9.92億元。

雖然公司一次過公布一四至一六年度業績皆見紅，但呢一刻都算壞消息出盡，加理呢兩年內房價格都升咗一截，公司近次配股又有個價做參考，吸引炒家上車博一博都有原因。但當然，呢期內房板塊氣氛麻麻哋，小注怡情跟炒即日埋單尚可，大大注就可免則免。

內房股勿手痕撈底

本地地產股昨日普遍低收，早前城中富豪話樓價一、兩年內無得跌，依家沽本地地產股會唔會早咗啲，真係見仁見智。不過，論跌幅昨日有內房股墊底，中國海外（00688）及華潤置地（01109）分別跌4.4%及2.6%；綠地香港（00337）跌7.3%；中國恒大（03333）、雅居樂（03383）及富力地產（02777）跌幅介乎5至6%。

重手落藥再起衝擊

咁全面的跌勢，主要是最近內地針對內房的調控政策，不單只是北京、廈門、廣州、佛山、中山等一、二線城市，還包括河北涿州、浙江嘉善等三、四線城市，受影響城市達到24個。中央一邊話要協助消化三、四線城市庫存，一邊又要收緊限購，是否存在政策矛盾？解決的方法，會唔會係犧牲內房企業利潤，減價促銷，益咗真正用家？

到底中央想點化解房地產泡沫，不妨等着瞧，但呢段時間內房股難免受陰霾籠罩，見到昨日萬科（02202）績後跌4.6%收場，綠城中國（03900）績後股價更急跌11.6%，正所謂「莫買當頭跌」，且別輕率入市博反彈。

古勝