絲絲講場：郁亮想轉「呔」幫公司沖喜?

隨住深圳地鐵成功入主萬科，歷時近一年嘅股權爭奪戰可以話暫告一段落，萬科一眾管理層終於都可以抖番啖氣！唔知係咁啱定有襯過，尋日出席業績發布會嘅四位管理層，都分別戴咗唔同色嘅領呔或絲巾。咦，綠色呔嗰位望落有啲滄桑啵？

講緊嘅係集團總裁郁亮。無法啦，董事長王石唔現身，郁總要擔大旗，難免缺乏休息時間。對過去一年嘅紛爭有何感想？佢笑話自己係農民，「種田的幹農活就是辛苦一點，面對外面天氣變化大，會顯得比較累一些！」佢話，本來為咗顯得青春啲，打條淺綠色領呔，點知顯得更加無精神，被人發現到佢憔悴。

內地紅升綠跌 港相反

佢仲話，後悔朝早喺深圳總部出席業績會時打咗呢條綠呔，畀人話搞到A股股價跌，下次唔應該再戴。點解？事關綠色喺內地股市代表下跌。照計郁總應該知，股民對紅同綠呢兩色幾咁敏感嘛！

內地紅色升綠色跌，香港意思就剛好掉轉，香港股民不知幾期待見到滿地綠，香港打綠呔完全無問題。郁總準備多條紅領呔喺內地用，嚟香港再換條綠呔，就包無問題啦！

余絲韻