「兩會」中，一如以往國務院總理的工作報告為市場提供了不少炒股小貼士。去產能、去庫存繼續成為大熱焦點，有跟開我的粉絲們都知，去產能概念其實好易炒，只要長揸住鋼鐵、煤炭同水泥板塊的龍頭股，如馬鋼（00323）同中國建材（03323）等，再加少少耐性，應有不俗回報。
至於去庫存，大抵都係指一些二、三線城市內房，他們唔需要承受太多政策調控。因此我早於上月中就指出：首月內銀新貸的海量規模，既然唔係去咗一線城市的話，就應該係去咗二、三線，這就解釋了為甚麼中國海外（00688）同華潤置地（01109）的表現咁削，新城發展控股（01030）同旭輝（00884）就屢破新高囉！
總理份功課內其實仲有一個亮點，就係總值8,000億元人仔的鐵路基建！雖然銀碼比唔上「侵侵」的1萬億美元，但我起碼睇得出阿爺有心用基建來撐住6.5%的經濟增長目標！
講到「一帶一路」同基建，就不得不提重卡於二月的靚仔銷情！話說當月挖掘機於內地賣了14,530部，按年升3倍！唔只呀，行內規矩應該三月先至係旺季，即係有排炒！
選股方面，我的首選係濰柴動力（02338），但係投機會揀三一國際（00631），因為他們的三一重工於一月份挖掘機的市場佔比達22.4%，係龍頭，較去年同期升兩個百分點。
雖然集團早前發盈警，指去年的爛數撥備多咗，但係隨住行業的氣提升，管理層又預期港口的機械業務有穩定發展，因此我認為短炒無妨，粉絲們可考慮於1.6元買入，目標價睇2元，跌穿1.35止蝕。
富昌金融研究部總監 譚朗蔚（作者為註冊持牌人士）